40 жылдық тәжірибесі бар маңғыстаулық вагон қараушы аса қауіпті 2 ақауды анықтады
Елімізде былтыр 1 қарашадан бастап биылғы 1 наурызға дейін «Бүйір рамасын бақылау» 4 айлығы өтіп жатқаны белгілі. Мақсат - еліміздің теміржолдарындағы қауіпсіздікті қамтамасыз ету. Жақында маңғыстаулық вагон қараушы Назархан Сариев арасына бір апта салып сондай 2 ақау тапты, деп хабарлайды Rail-news.kz.
Жалпы пойыздардың ақауын табу - теміржолда компания басшылығы ерекше жоғары бағалайтын жетістік. Себебі дер кезінде анықталмаған ақаулар вагондардың жолдан шығып кетуіне әкеліп, бүкіл құрамға ғана емес, ондағы жүктерге және ең бастысы адамдар өміріне қауіп төндіреді.
Назархан теміржолшы тапқан ақаудың екеуі де бүйір рамасынан анықталды. Біріншісінде бүйір рамасының 3 жерінде диаметрі – 1 мм, тереңдігі 11-12 мм болатын сызаттар тапты. Бұл вагон Түрікменстан теміржолына тиесілі екен. Бірақ ар жағы раманы өндіруші ел – Румыния, рама 1989 жылы құйылыпты. Екінші ақауды «Днепровагонмаш» АҚ-ға тиесілі вагоннан анықтаған. Бұл жолы сызаттың диаметрі – 8 мм, тереңдігі – 22 мм. Көлеміне қарағанда ақау өте күрделі, қауіпті түріне жатады. Мұндай ақауларды жұмысына ыждаһатты және тәжірибелі вагон қараушылар ғана анықтай алады. Расымен Назархан Сариевтің вагон шаруашылығындағы жұмыс тәжірибесі мол.
Осы еңбегі үшін ол басшылық тарапынан марапатталып, екі рет «Қозғалыс қауіпсздігі үшін» төс белгісіне ие болды, сондай-ақ төл мереке қарсаңында Құрмет грамоталары мен Алғыс хаттар алып жүр.