Ақтөбелік теміржолшылар пойыздың жолын ашу үшін күндіз-түні қар тазалап жатыр
Ақтөбе облысы бойынша меншікті тілші
Ақтөбеде теміржолшылар демалыс күндері магистраль бойын тәулік бойы жауған қардан тазарту жұмыстарына жұмыла кірісті. Құбылмалы ауа райы кезінде күндіз-түні жауған қар уақытылы тазартылып, пойыздардың кідіріссіз және қауіпсіз қозғалысы қадағаланды.
Ақтөбе магистральдық желі бөлімі басшысының орынбасары Темірғали Көштаевтың айтуынша, Никельтау, Әйтеке би, Мұғалжар, Бершүгір, Қандыағаш, Жем учаскелерінде арнайы қар тазалайтын 4 СДПМ техникасы тәулік бойы жұмыс жасаған. Нәтижесінде барлық жылжымалы құрам кестеге сай қозғалып, уақытынан кешіктірілген жоқ.
Айтуынша, Ақтөбе, Қандыағаш, Шалқар станцияларында қар тазалайтын сегіз техника жұмыс істеп жатыр. Бершүгір учаскесінде арнайы ФРЭС, МКТ техникаларының жұмысы күшейтілген. Аймақта жолды қардан тазарту жұмыстарына күндіз 138 адам, түнгі мезгілде 158 адам кезектесіп жұмыс істеп жатыр екен. Техника жолдың қарын аршыса, жолшылар стрелка бұрмаларын тазалауда.