Батыстағы жүк тасымалы қарқынды
Ақтөбе облысы бойынша меншікті тілші
«ҚТЖ-Жүк тасымалы» ЖШС – «Батыс» филиалының басшысы Бөріхан Беркімбаев өткен жылдың жұмыс қорытындысын жариялады.
Аймақта жүк тасымалдау көрсеткішімен қатар, еңбек өнімділігі негізгі межеден артығымен орындалды. Ақтөбе және Орал аймақтарының 2021 жылдың қорытындысы бойынша жүк айналымының көрсеткіші 5,4%-ға асыра орындалды. Атап айтсақ, 21 291,0 млнткм 22 445,9 млнткм болып орындалған. Тасымалдаудың негізгі қызметінен түскен кіріс 2020 жылдың сәйкес кезеңімен салыстырғанда 23,3%-ға өсті немесе 10 млрд 121 млн 459 мың теңгеге артық. Сонымен қатар, жылдық көрсеткіште пойыздар қозғалысы кестесінің көрсеткіші де жақсарған. Қозғалыс қауіпсіздігін қамтамасыз ету де жоғары деңгейде.
Есепті кезеңде пойыздарда отын-энергетикалық ресурстарды тұтынуда да үнемдеу болған. 2020 жылмен салыстырғанда пайдаланылған отын 620,06 тоннаға үнемделген.
Қауіпсіздік ұғымын негізгі қағида санайтын салада жол сапасы негізгі критерий болып саналады. Өткен жылы аймақта 54,6 км теміржолға күрделі жөндеу жүргізілді. Оның ішінде ұзындығы 6,4 км болатын Шалқар-Үшқұрай асуы, Қайыр-Қайдауыл асуындағы 7,72 км жол, Қайдауыл-Ұлпан асуында 19,2 км жол, Қарауылкелді станциясының аумағына күрделі жөндеу жұмыстары өтті.
Сондай-ақ, жоспар бойынша 18 876 шақырымды құрайтын Алғабас-Аңғаты учаскесіне толықтай күрделі жөндеу жүргізілді. Қандыағаш-Сексеуіл, Жем-Ақтөбе, Қандыағаш-Илецк, Ақтөбе-Орал, Шалқар-Бейнеу учаскелерінде пойыздардың тоқтау сағатын азайту және қызмет көрсету кепілдіктерін арттыру бойынша пилоттық жобалар жүзеге асырылып, табысты жұмыс істеуде.