Озық технологиялар Маңғыстау теміржолындағы қауіп-қатерді азайтуға септігін тигізіп отыр
Маңғыстау облысы бойынша меншікті тілші
Маңғыстау белгі беру және байланыс дистанциясында құрылғыларды заман талабына сай жабдықтап, қауіпсіздікті қамтамасыз ету көрсеткіштерін жоғарылату бағытында жүзеге асырылып жатқан игілікті істер аз емес.
Дистанциялықтар өткен жылдары бағдаршамдар жарығын арттыру мақсатында линзалық жиынтықтар жаңа жарықдиодты модульдерге ауыстыру жұмыстары қолға алынған болатын. Бұл жұмыс әлі де жалғасуда.
Сондай-ақ, мекеме жұмысшыларының күшімен Жетібай, Маңғыстау, Қарақия станциялары және «Р» бекетіне заманауи технологиялық микропроцессорлы диспетчерлік орталықтандыру құрылғылары іске қосылды. Осы қондырғының арқасында пойыздық диспетчерге жоғарыда көрсетілген станцияларды толық қадағалау мүмкіндігі туды. Нәтижесінде пойыз диспетчері станциялардың жағдайын бақылап, жолдардың бостығын, бағдаршамның ашылып-жабылып тұрғанын көріп, біліп отырады.
Сонымен қатар дистанцияның 16 бекеттегі жұмысшылары енді су жаңа модульдік ғимараттың игілігін көреді. Бекетте ескі электрондық орталықтандыру постының орнына барлық жағдайы жасалған, кондиционері, жылыту пештері бар, қажеттілікпен толық қамтылған модульдік ғимарат пайда болды. Аталған нысан байланыс саласының қызметкерлері үшін ыңғайлы жұмыс орны ғана емес, СОБ қондырғылары үшін де ыңғайлы, қауіпсіз және қолайлы орын болмақ. Бұған дейін пайдаланылып келген, 1982 жылы тастан салынған ескі ғимарат ішіндегі құрылғылар сәуір айында жаңа модульдік ғимаратқа көшірілмек.