Семей ЖТ бөлімшесінің кәсіподағы биылға жоспарланған іс-шараларды нақтылады
Абай облысы бойынша меншікті тілші
«Қазақстандық салалық теміржол, автомобиль, әуе және су көлігі қызметкерлерінің кәсіби одағы» қоғамдық бірлестігі тарапынан биылғы 30 жылдыққа орай елеулі шаралар қолға алынуда.
Жуырда Семей ЖТ бөлімшесі кәсіподақ ұйымының жетекшілері бас қосып, атқарылар іс-шаралар жоспарын құрып, алдағы жұмысты пысықтады.
Бөлімшенің кәсіподақ ұйымы төрағасы Алик Досанов 30 жылдық аясында жүзеге асырылуы тиіс межелі жоспарлармен таныстырып, шаралар қатары қазірден бастап іске асырылып, алдағы жаз айларында күш алатынын жеткізді. Оның ішінде теміржолшылар арасындағы мүмкіндігі шектеулі балалары бар немесе көпбалалы отбасыларды әлеуметтік тұрғыдан қорғау, ардагерлерге құрмет көрсету, балалар үшін тарихи орындарға саяхат пен патриоттық-тәрбиелік мәні бар шаралар ұйымдастыру, бұқаралық-спорттық сайыстар өткізу сынды қайырымдылық акцияларына ерекше басымдық берілмек.
Сонымен қатар, кәсіподақ жұмысын әйгілейтін арнайы стенд әзірлеу де ойластырылуда. Ал теміржолшы жастар бірнеше флэшмоб ұйымдастырмақ.
Жиын барысында кәсіподақ белсенділері арнайы баннер, логотип хэштегін әзірлеу сынды мәселелерді талқылады. Әрбір имидждік іс-шараның өткізілетін мерзімдері белгіленіп, жауапты тұлғалар тиісті нұсқаулықтар алды.