Пойыз апатының алдын алуға септігін тигізген жол шебері марапатқа ұсынылды

Шоқпар жол дистанциясының жол шебері Таңат Ақылбай кәсіби теміржолшыға лайық қырағылығы арқасында локомотивтің түтіндеп бара жатқанын байқап қалып, үлкен қауіптің алдын алды.

Оқиға былай болған еді. Ағымдағы жылдың 17 ақпанында Шу-Отар теміржол телімінің Құлақшын-Бел аралығында күндізгі сағат 12-ден 08 минут кеткенде теміржолға ағымдық күтім бойынша жұмыс жүргізіп жатқан жолшылар жұп жолдан №2492 жүк пойызын өткізеді. Осы кезде жол шебері Таңат Ақылбай құрамды тартып бара жатқан электровоз локомотивінің қос доңғалағының түтіндеп бара жатқанын байқап қалады. Жол шебері бұл жағдайды дереу Бел станциясының өткел кезекшісіне хабарлайды. Өткел кезекшісі Қанат Ереншиев суыт хабарды алған бойда машинист Бойченко жүргізіп келе жатқан №2372 электровоздың қос доңғалағы түтіндеп келе жатқанына көз жеткізіп, шұғыл рациямен машинистке шығып, локомотивті тоқтатуға пәрмен береді. Машинист Бойченко пойызды тоқтатып, қауіп сейілді. Осылайша, өз міндеттеріне адалдық танытып, сын сағатта сауатты әрекет еткен жол шебері Таңат Ақылбай мен өткел кезекшісі Қанат Ереншиев Ұлттық компанияға қыруар шығын әкелетін қатердің алдын алды.

Әріптестері Қанат Ереншиевтің де, Таңат Ақылбайдың да тәжірибелі, еңбекке адал да жауапты, шұғыл шешім қабылдай білетін қасиетке ие теміржолшылар екенін айтады.Таңат Ақылбай Шоқпар жол дистанциясында жол монтері бо- лып бес жыл жұмыс істеп, былтыр жол шебері болып тағайындалған. Ал Қанат Ереншиев теміржол саласындағы еңбек жолын сонау 1988 жылы бастапты. Ұзақ жыл жол монтері болып, Шоқпар жол дистанциясының өткел кезекшісі қызметіне былтыр ауыстырылған.

Шоқпар жол дистанциясының басшылығы мен ұжымы Таңат Ақылбай мен Қанат Ереншиевті «Адал еңбегі үшін» төсбелгісіне ұсынып, жоғары басшылыққа хат жолдаған.