Қандыағаш станциясы төрт тарапқа қызмет көрсетеді

Қандыағаш станциясының тарихы өткен ғасырдың басында салынған Орынбор-Ташкент темір жолымен байланысты. Былтыр кластан тыс сұрыптау станциясының құрылғанына 120 жыл толды.

  Бүгінде республикалық маңызы бар Қандыағаш станциясы тоғыз жолдың торабына айналып, төрт бағытқа қызмет көрсетеді. Станцияда қуаты орташа сұрыптау дөңесі, 5 парктен тұратын 3 маневрлік аудан бар. Дөңесалды, сұрыптау, жөнелту, қабылдап жөнелту және Қандыағаш-2 парктер жұмыс істейді. Қазіргі таңда станцияда 7 бірдей маневрлік локомотив жұмыс істейді. Олардың ішінде 4 маневрлік локомотив құрамдарды парктен паркке қайта ауыстыру, вагондарды кіреберіс жолдарға және вагон жөндеу кәсіпорындары жолдарына әкелу, жинау, ағыту және тіркеу, вагондарды ауыстырып қою, жолаушылар пойыздарын өңдеу, Ақкемер және Темір станцияларының кіреберіс жолдарында вагондарды беру және жинау бойынша қызмет көрсетеді. 3 маневрлік локомотив дөңестегі маневрлік жұмыстармен айналысады, оның екеуі құрамды жылжыту, біреуі сұрыптау паркі жолда- рында жұмыс істейді.

Станцияның маневрлік жұмыстарын күшейту үшін Никельтау, Ембі, Шұбарқұдық бағытынан қосымша жолдар салынған. Сұрыптау дөңесі ГАЦ-АРС жүйесімен жабдықталған, 21 жолдан тұрады. Сұрыптау дөңесінің 3 тежегіш қызметі автоматтандырылып, 31 баяулатқыш орнатылған. Яғни Қандыағаш станциясы автоматтандырылған басқару жүйесі бар, теміржол желісі бойынша ірі сұрыптау станциясына жатады.

Станция бастығының орынбасары Талғат Бисалының айтуынша, 2020 жылы пандемия басталғанына қарамастан станция сұрыптау дөңесі арқылы 1 млн 100 вагонды өңдеуден өткізіп, рекордтық көрсеткіш орнатты.

Бүгінде «ҚТЖ-Жүк тасымалы» ЖШС, «Ақтөбе жүк тасымалы» бөлімшесіне қарасты станцияда барлығы 244 адам еңбек етеді. Соның ішінде 51 станция кезекшісі, 32 пойыз құрастырушы бар. Осыдан-ақ, станция жұмысының ауқымдылығын байқауға болады.