Маңғыстауда машинистер 2 айда 11 рет пойызды шұғыл тоқтатқан

Аймақтар

15.03.2022, 12:15

Маңғыстау облысы бойынша меншікті тілші

Маңғыстаулық теміржолшылардың малдың жолға шығуына қарсы жасап жатқан әрекеті нәтиже беруде. Өткен жылмен салыстырғанда төрт түліктің жолға шығу деректері сәл де болса азая бастаған.

Өткен қаңтар-ақпан айларында Маңғыстау жол дистанциясы аумағында пойыз машинистері малды баспас үшін 11 рет шұғыл тежегіш қолданған. Былтыр бұл мерзімде 17 оқыс тежеу тіркелген. Биыл 4, ал былтыр 6 ірі қара малды пойыз басқан. Теміржолшылар мен желілік полиция өкілдерінің жедел әрекет етуі нәтижесінде басылған төрт малдың да иесі табылып, ҚР Әкімшілік құқық бұзушылық туралы Кодексінің 30-тарау 559-бабы 1-бөлігіне сәйкес ескерту берілген. Бұл аталған деректер 11-12 және 12-13 Ақбөбек бекеті мен Бопай станциясы аралықтарында орын алған.

– Теміржолға мал шығуының қауіптілігінен бөлек оның экономикалық зияны да бар. Мәселен, осы жылы оқыс тежеулер салдарынан 0,55 т жағармай артық шығындалды. Жол қозғалысына кедергі келтіруі өз алдына. Дистанция мамандары өткен екі ай ішінде 204 мал иесімен кездесіп, ауыл тұрғындарына теміржол бойына мал бағудың қауіптілігі түсіндірілді. Желілік полиция өкілдерімен бірлесе ауыл мектептерінде де кездесулер өтті. Маңғыстау, Қарақия, Мұнайлы аудандарының әкімдіктеріне жеке шаруашылық, шаруа қожалығы иелеріне түсінік жүргізу, бақташы ұстау туралы екі рет хат жолданды. Малға қарсы қоршауды көбейту үшін ірі қараның көп жайылатын, қыстаудан жайлауға, жайлаудан қыстауға көшетін жерлерін анықтау туралы сұраныс берілді, – дейді Маңғыстау жол дистанциясының жетекші жол инженері Ержан Артықбаев.

Дистанция маманы, сондай-ақ, биыл 70 шақырым малға қарсы қоршау тұрғызу жоспарланып отырғанын жеткізді. Қоршау 11-12 және 14-15 бекеттер аралықта- рына салынатын көрінеді.

Маңғыстауда машинистер 2 айда 11 рет пойызды шұғыл тоқтатқан

Басқа да жаңалықтар