Шығыста құрылыс материалдарын тасымалдау қарқынды жүріп жатыр

Ел шығысында тиеліп, шартарапқа тасымалданатын жүктердің ішінде құрылыс материалдарына ерекше басымдық беріледі. Оған бірден-бір себеп, ұлттық компаниямен тығыз әріптестік орнатқан «Alina» ЖШС, «Семей силикат зауыты» АҚ мен «Семей цемент зауыты» ЖШС өнімдерінің сұраныстан түспеуі болып отыр.

  Дегенмен биылғы жыл басынан бергі көрсеткіштерге сүйенсек, Семей ЖТ бөлімшесі бойынша цемент өнімін тиеу күрт артып отыр. Оған бірінші кезекте аймақтағы тұрғын үй құрылысының қарқын алуы ықпал етуде. Соның нәтижесінде Суықбұлақ, Жаңа-Семей, Семей станцияларындағы өндіріс барысына қосымша маневрлік тепловоздар тартылуда. Сәйкесінше, вагондармен қамту және бос вагондарды уақытында жинап алу бойынша біршама күрделі жағдай туындаған.

Мәселен, «Семей цемент зауыты» ЖШС үшін Суықбұлақ станциясынан арнайы шикізат тиеу соңғы екі айда күрт қарқын алыпты. Тек бір айдың ішінде   1036 мың тоннадан тұратын 1501 вагонның жүгі тиелген. Бұл – өткен жылдың есепті мерзімімен салыстырғанда анағұрлым артық көрсеткіш.

Сол тәрізді аталған зауыттың өнімдерін тиеу мен жөнелту бойынша Жаңа-Семей станциясында жоспарлы шаралар қатары қолға алыныпты. Оның себебі межеге алынған жүк тиеу жұмыстарының белгіленген мөлшерден біршама асып кетуі болып отыр. Осылайша, жаңа-семейліктер бір айдың ішінде жоспарды артығымен орындап, қосымша жүк жөнелтіп жатыр. Есептік көрсеткіш өткен жылмен салыстырғанда 3,5 тоннаға артыпты.

Қазіргі таңда әсіресе Жаңа-Семей, Суықбұлақ, Аягөз станциялары бойынша жүк тиеу мен түсіру жұмыстары қарқын алған. Оның ішінде жергілікті зауыттарда өндірілген цемент өнімінің үлесі айтарлықтай өсіп отыр.