Қандыағаш станциясында жүк айналымы көрсеткіші өсті
Ақтөбе облысы бойынша меншікті тілші
Қандыағаш кластан тыс ірі сұрыптау станциясы төрт бағытқа қызмет көрсетеді. Басқару жүйесі толық автоматтандырылған. Ірі тораптық станцияда 21 жолдан тұратын сұрыптау дөңесі жұмыс істейді.
Станцияда биылғы жүк айналымы көрсеткішінде қарқынды өсім бар. Қазіргі уақытта тәулігіне 80 жұп пойызды қабылдап-жөнелтіп отыр. Аумақта бес парктен жабдықталған 3 маневрлік аудан, 7 маневрлік локомотив жұмыс істейді, 11 кірме жол бар. Оның ішінде жұмыс күнделікті тоқтамайтын, күніне 7-8 вагон жүк тиелетін кірме жолдар бар. Ең кішкентай деген кірме жолдың өзінде айына 30 вагонға дейін жүк тиеледі.
Қандыағаш станциясының басшысы Асхат Мажитов автоматтандырылған сұрыптау дөңесімен таныстырды. Мұнда тоқтаусыз жұмыс істеп тұрған 21 жолға 31 баяулатқыш орнатылған. 12 сағатта 1200-1300-ге дейін вагон түсіріледі. Тәулік бойғы жұмыс көрсеткіші 2500 вагонға жетеді. Бір жылда сұрыптау дөңесінен өткен вагондар саны миллионнан асып тұр.
Төрт маневрлік локомотив құрамдарды парктен паркке ауыстыру, вагондарды әкелу-әкету, ағыту, тіркеу, ауыстыру, өңдеу, т.б. жұмыстарды тәулік бойы 24 сағат тоқтаусыз жүргізеді екен.
Құжаттарды өңдеу орталығының операторы Света Жолмұрзаеваның айтуынша, таңнан бастап сағат 16:30-ға дейінгі уақытта сұрыптау дөңесінде 634 вагон өңделген. Бүгінде 242 адам еңбек ететін станция Тобыл – Астана, Сарыағаш – Астрахань, Арыс – Мақат, Тобыл – Ақтөбе бағыттарына жүк жөнелту және қабылдау жұмыстарын мүлтіксіз ұйымдастырып отыр.
