Ескі бұрмалар жаңа темірбетонды негізге көшіріліп жатыр

Ақтөбелік теміржолшылар жылжымалы құрамның қозғалыс қауіпсіздігін сақтауды арттыру үшін кешенді жұмысты қолға алды. Жол шаруашылығында күрделі жөндеу жүріп жатыр. Биылғы жоспар бойынша Ақтөбе магистральдық желі бөлімшесі аумағында 14 бағыттамалы бұрма жаңартылуға тиіс. Қазіргі уақытта оның тоғызында жұмыс аяқталып, ескі бұрмалар жаңа темірбетонды негізге көшірілді.

Жыл соңына дейін жоспар бойынша тағы бес станцияда бұрмалар ауыстырылмақ. Осыған дейін қолданылып келген ағаш білеулі бағыттамалы бұрмалардың пайдалану мерзімі өтіп, отыз жылдан бері ауыстырылмағандықтан қозғалысқа қауіп төндіре бастаған. Міне, биыл уақыт талабына сай төзімділігі мен тиімділігі жоғары темірбетонды нұсқаға ауыстыру жұмыстары жаппай жүргізіліп жатыр.  

Кешегі күні Ақтөбе станциясында бағыттамалы бұрманы ауыстыру жұмысына Ақтөбе жол дистанциясының төрт айналымынан 50 шақты жолшы жұмылдырылған. Алты сағаттық толаскез ішінде олар ЕДК 500 кранының көмегімен бағыттамалық аударманы толық ауыстырып бітулері тиіс.  

– Келісілген уақыт шеңберінде жоспарланған жұмыстың бәрі ретретімен, ең бастысы техникалық талаптарға сай жүргізіліп, Ақтөбе станциясы жолындағы бағыттамалы бұрманы жаңарту сәтімен жүзеге асырылды дей аламыз. Бұдан бұрын Қаратоғай, Жайсаң, Жіңішке және 39-разъезде бұрмаларды ауыстыру жұмыстары жүргізілген. Алдағы уақытта тағы бес бұрманы осы тәсілмен өз күшімізбен ауыстырамыз, – деді Ақтөбе жол дистанциясы бастығының орынбасары Дархан Орынбаев.  

Айтуынша, қолданылып жатқан материалдардың дені – отандық өнімдер. Жаңа бағыттамалы бұрмалар қозғалыс қауіпсіздігі, жолдың қызмет көрсету сапасын жақсартып қана қоймай, жылдамдыққа да оң әсерін тигізіп, ең бастысы жол табанының сенімділігін арттырмақ. Бұл өз кезегінде жолдың жоғарғы құрылысының қызмет ету мерзімін ұлғайтып және ағымдағы күтіп-ұстауға жұмсалатын пайдалану шығындарын азайтуға мүмкіндік береді.