Батыста логистикалық хаб салынады
Ақтөбе облысы бойынша меншікті тілші
Қазақстанның географиялық жағынан трансұлттық дәліздің дәл ортасында орналасуы үлкен мүмкіндіктер мен тиімді жобаларға жол ашады. Шетелдік инвесторлар Батыс өңірінен мультимодальды көлік-логистикалық хаб салып, жаңа сауда желісін дамытуға қызығушылық танытып отыр.
Астанада өткен «KGIR 2022» жаһандық инвестицияларға арналған дөңгелек үстелде Ақтөбе облысының әкімі мультимодальды көлік-логистикалық хаб салу жобасына қатысты меморандумға қол қойды. Жаңа мультимодальды көлік-логистикалық хаб көлік саласын дамытып, соның ішінде темір жол арқылы жүк тасымалын жандандырып, жаңа сатыға көтеруге мүмкіндік берері сөзсіз.
«ҚТЖ-Жүк тасымалы» ЖШС Батыс аймақтық филиалының басшысы Бөріхан Беркімбаев жаңа жоба туралы айтып берді. Облыстық штаб кеңесінің өкілі саналатын аймақтық темір жол бөлімшесінің басшысы мемлекеттің көлік әлеуетін арттыру үшін жасап жатқан жұмыстарға тоқталды.
«Ақтөбеде Батыс Қазақстан аумағы бойынша тауар жеткізуді реттейтін көлік-логистикалық хаб салу жобасы қолға алынды. Хаб аймақтық көлік-логистикалық жүйенің негізгі элементіне айналады деп күтілуде. Ол барлық қатысушылардың келісілген өзара іс-қимылын, сондай-ақ көліктік, инвентарлық, сервистік, ақпараттық және қаржылық ағындарды біріктіруді қамтамасыз етеді, – деді Бөріхан Беркімбаев.
Облыстың көліктік логистика тұрғысынан қолайлы орналасуы, экономикалық әлеуетінің қарқынды дамуы – жобаның өзектілігін арттыра түсетін факторлар.
Ақтөбе облысы Қазақстандағы экономикалық және стратегиялық маңызы зор ірі өңір екені белгілі. Аймақ хром, титан, никель қорына бай. Жаңадан салынатын логистикалық хаб теміржол, автожол, әуе жолы қатынасы арқылы жүк тасымалын бір жерден ұйымдастыруға қол жеткізіп, нәтижесінде тиімділікті еселеп арттырады деген болжам жасалып отыр.
Президент Қ.Тоқаев Қазақстан темір жолы мультимодальды транзиттік-логистикалық корпорация болып қайта құрылуы керек деген міндет қойып отыр. Еліміздегі экономикалық көрсеткіштердің бәрі көлік саласымен, оның ішінде теміржол тасымалымен байланысты. Осы тұрғыда жаңа жоба Қазақстанның жаһандық және аймақтық инвесторлар үшін мүмкіндігін таныта түсетіні талас тудырмайды.