Қызылорда өңірінде көмірден тапшылық болмайды

Өңір тұрғындарын қыс маусымында қажетті коммуналдық-тұрмыстық көмір, мазут отынымен қамтамасыз ету жұмыстарында еш кідіріс жоқ. Көмір аймақтағы бекеттерде кезексіз, айқай-шусыз таратылып жатыр.

«ҚТЖ-ЖТ» ЖШС «Батыс» филиалы Қызылорда қосалқы бөлімі бастығының логистика жөніндегі орынбасары Мейрамбек Шолтабаев көмір қоры қоймаларда жеткілікті екенін жеткізді. Қызылорда облысы бойынша биылғы жылыту маусымына берілген жоспар 176,2 мың тонна болса (коммуналдық-тұрмыстық қажеттілікке 33,6, тұрғындардың тұтынуы үшін 142,6 мың тонна) бүгінгі күні қоймаларға келіп түскені 120,7 мың тонна, жалпы қажеттіліктің 68,5 пайызы жеткізілген.  

Бүгінгі таңда жол бөлімшесі бойынша көмірдің станцияларға жеткізілуі, кірме жолдардағы көмір қалдықтары жайлы тәуліктік мониторинг жүргізіліп, облыстық Энергетика және коммуналдық шаруашылық басқармасына ұсынылуда.  

– Қызылорда қосалқы бөлімі басшылығы тарапынан ағымдағы маусымда халықты тұрмыстық көмірмен қамтамасыз ету жұмыстары күнделікті қадағалауда. Көмір отынымен қамтамасыз ету және аудандардағы көмірдің қолжетімділігіне көз жеткізу мақсатында құрылған бақылау топтары жергілікті тиісті органдармен, тұрғын үй-коммуналдық шаруашылық ұжымының бас мамандарымен бірлесе отырып көмір қоймаларындағы жағдайды назарда ұстап отыр. Көмір қоры жеткілікті, тұрғындар тарапынан ешқандай дүрбелең жоқ, кезек те жоқ. Облыс аудандарындағы қоймаларда, бүгінгі таңда жалпы көлемі 12,9 мың тонна көмір бар. Мұны бекеттер бойынша таратып айтар болсақ, Сексеуіл станциясында 69 тонна, Арал теңізінде 414 тонна, Қазалыда 7420 тонна, Белкөлде 1035 тонна, Жаңақорғанда 4000 тонна көмір тұр, – деді Қызылорда қосалқы бөлімі бастығының логистика жөніндегі орынбасары Мейрамбек Шолтабаев.

Шынында көмір қоймалары маңында тұрғындардың таң азаннан кезекке тұрып таласуы секілді қолайсыздықтар бүгінде жоқ, ондай жағдайлар өткен күндердің еншісінде қалғаны байқалады. Бұл әрине, өңірдің қысқа қамды ерте жасап және жылыту жүйесінің басым бөлігінің көгілдір отынға ауысуымен де байланысты. Сонымен қатар аймақ теміржолшылары да көмір тасымалдаушыларды қажетті вагонмен бірінші кезекте қамтамасыз етіп отыр.  

Қазір жүк жөнелтушілер мен теміржол қызметкерлері арасында тығыз байланыс орнатылған. Тапсырыс берушілер өз жүгінің қай бекетте келе жатқанын АСУ жүйесі арқылы біліп отыра алады. Сонымен қатар телефон арқылы да, ортақ чат арқылы да хабарласып, жүкке қатысты жағдайдан хабардар болады. Аймаққа келіп жатқан көмірдің басым бөлігі Шұбаркөл, Майкөбен, Богатырь, Қаражыра секілді көмір кеніштерінен жеткізілуде.