Ардагер теміржолшылар тәжірибелерімен бөлісті
Маңғыстау облысы бойынша меншікті тілші
Маңғыстау темір жолында тәрбиелік һәм тағылымдық маңызы зор кездесу өтті. Аға буын ардагерлер мен бүгінгі жас буын бас қосты.
Жиынға аймақ темір жолының түрлі саласында еңбек етіп жүрген жастар арнайы шақырылып, ғибратқа толы өмір жолы еңбекпен өрілген аға буынның әңгімесін тыңдап, емен-жарқын сұхбат құрды. Олар Маңғыстау вагон пайдалану депосын талай жыл басқарып, зейнетке шыққалы отырған Сәрсенбай Есенқұловқа, Маңғыстау локомотив пайдалану депосының ардагер машинисі Ақан Хасеновқа, станция бастығы болған Ақназар Қайнарбаевқа кәсіби қызметтеріне байланысты түрлі сауалдар жолдап, олардың қызығы мен шыжығы мол өткен өмір жолына қанығып, кеңес алды.
Жас буын үшін қызықты әрі рухани азық болған жиын соңында сөз алған қосалқы бөлім бастығы Нәжімеден Ғұбашов меймандардың Маңғыстау темір жолының өркендеуіне қосқан үлесіне жеке-жеке тоқталып өтті. Жастармен дидарласып, осындай басқосуға мұрындық болғандары үшін алғыс айтты. «Бұл нағыз шеберлік сабағы болды деп ойлаймын» деді. Қонақ кәдесіз болмас демекші, ардагерлерге естелік сыйлықтар табысталды.