Ұйытқып соққан дауыл теміржолшыларды әбігерге салды
Тараз қаласы бойынша меншікті тілші
Түлкібас жол дистанциясының жолшылары үшін де қарбалас күндер басталды. Түлкібас – Тараз телімінің таулы аймақтарына қар қалың түсіп, қаңтардың 3-4 күндері ұйытқып соққан дауыл аз әбігер әкелген жоқ.
Пойыздар қозғалысын тоқтатпай, қауіпсіздікті қамтамасыз етуге ұмтылған жолшылар Абайыл, Шақпақ, Боранды станцияларындағы бұрмаларды тазалауға кірісті. Оған дистанциядан 80 жұмысшы мен «Камаз Вахтовка», «Фермер» УАЗ көлігі тартылды. Боранды станциясында халық шоғыры көбейген соң жолаушыларға кедергі болмасын деп платформа мен перронды да қардан тазалады.
– Жер рельефі күрделі аймақта еңбек ететін түлкібастық жолшылар үшін жол күтімінің де өзіндік ерекшеліктері мен осындай «тосынсыйлары» жетерлік. Техникалық сабақтарда бұл басты тақырыпқа айналған. Біздің жолшылардың бәрі дерлік өз кәсібін жақсы игерген, еңбекті қорғау мен өндірістік қауіпсіздік қағидаларын меңгерген мамандар десем, артық айтпаймын. Қаңтардың 5-і күн ашылып, қар ери бастады. Дегенмен, алда тағы қар жауып, аязды күндер болатыны ескертілуде, сондықтан дайындығымызды одан әрі пысықтап отырмыз, – дейді Түлкібас жол дистанциясының бастығы Болат Бурабаев.
Жалпы, дистанцияның Түлкібас – Тараз теліміндегі қызмет көрсететін аумағы – 112,2 шақырым. 240,9 шақырым бұрмалы жолдар бар. Дистанцияда 22 өткел болса, оның төртеуі ғана күзетіледі.