Станция аумағын қардан тазалауға теміржолшылармен қатар теміржол полициясы да жұмылдырылды
Ақтөбе облысы бойынша меншікті тілші
Ақтөбенің Шұбарқұдық вокзалының айналасы қардан тазартылды. Жергілікті теміржолшылар өз күштерімен ұйымдасқан түрде қар тазалауға шығып, перронда қатқан мұзға дейін ойып, жолаушыларға жағдай жасады.
Сегіз жолақты Шұбарқұдық станциясынан тәулігіне 16-18 жұп пойыз өтеді. Екі жол жолаушылар пойызына арналған. Қазір ауа райының қолайсыздығынан автожолдар қатынасы ішінара тоқтатылып, көпшілік сенімді де қауіпсіз көлік түрі – темір жолды таңдаған. Бұл әрине өз кезегінде жолаушылар ағынын күрт өсіріп отыр.
«Биыл анау айтқандай қалың қар жаумады. Дегенмен қаңтарда үсті-үстіне жауған қарды дер кезінде тазалап отырдық. Жолаушылар қауіпсіздігі үшін перронды да мұздан тазартып, кей жерлерге құм мен тұз себілді. Станция аумағы мен перронды қардан тазалауға осындағы барлық теміржолшылар жұмылдырылды, олардың қатарында теміржол полициясы да бар», – дейді станция бастығы Алтай Абдуллин.