Шу белгі беру дистанциясы жақсы көрсеткішке қол жеткізді
Тараз қаласы бойынша меншікті тілші
Шу белгі беру және байланыс дистанциясында өткен жиында былтырғы жылдың жұмыс қорытындысы шығарылды.
Дистанция бастығы Қайрат Сазаев жыл он екі ай қозғалыс қауіпсіздігін еңсеруде тынбай еңбек еткен әріптестеріне алғыс айтты.
Бүгінде 326,1 км Шу – Шығанақ телімінде пойыздар қозғалысы қауіпсіздігін қамтамасыз етіп отырған дистанциялықтар 17 станция мен 1 блок-бекеттегі 355 459 техниканың ақаусыз жұмыс істеуіне жауапты. Осы аралықтағы 431 бұрма мен 835 бағдаршамды күні-түні қадағалап отырған дистанциялықтар өткен жылы қауіпсіздікті қамтамасыз етумен қатар еңбек қорғауда да жақсы көрсеткішке жеткен.
Дистанция қызметкерлерінің орташа айлық жалақысы 311 976 теңгені құрады. Ал пойыздар қозғалысына қатысы жоқ 4 санатты жұмысшылардың төменгі жалақысы 138 586 теңге көлемінде болды.
– Есепті мерзімде белгі беру-байланыс құрылғыларын кешенді сауықтыру және еңбекті қорғау, қауіпсіз жұмыс орнын ұйымдастыру мен санитарлық-сауықтыру шаралары 100 пайыз орындалды. Технологиялық процесте көп жұмыс атқарылды. Бірлік-1 станциясындағы дизельдік генератор түріктер шығаратын ДГА-48 құрылғысына ауыстырылды. Сонымен қатар Шу-Отар-Шығанақ теліміндегі 140 бағдаршам лампалары жарықдиодты модульге алмастырылды. Жиделі – Бірлік-1, Шоқпар, Бел станциялары аралығындағы үш күзетілетін өткел күзетілмейтін жүйеге көшірілді, – деді дистанция бастығы Қайрат Сазаев.
Жиын соңында өткен жылы үздік жұмыс үлгісін көрсеткен цехтар марапатталды.
