Деподағы бар күш мамандардың біліктілігіне түсіп отыр

Атырау вагон пайдалану депосының қызмет көрсету аясы Астрахань облысына таяу Ақсарай станциясынан бастап Бейнеу мен Қандыағаш аралығын қамтиды. Осы аралықта вагондардың қозғалыс қауіпсіздігіне жауап беретін байырғы депода бес жүзге жуық адам еңбек етеді.

Атырауда жүзге жуық, Мақат пен Ақжайық станцияларында 150-ден, Ганюшкинода – 70, Махамбет, Құлсары мен Мақатта 50 шақты теміржолшы тер төгуде. Бәрі де жергілікті, бірнеше буын теміржолшылар династиясын жалғастырып келе жатқан кәсіби мамандар. Бүгінде депоның 5 техникалық күтім және қызмет көрсету пункті, 2 бақылау пункті, 15 қауіпсіздік посты бар. Бұларда аға буын өкілдерінің зор тәжірибесі кейінгілерге үлгі ретінде таратылады.  

Жуырда депода өндірістік-техникалық қызмет көрсетудің сапасын арттыру мақсатында «Купе және плацкарт жолаушы вагондарының доңғалақ жұптарын ауыстыруды практикалық түрде үйрету» тақырыбы бойынша екі күндік техникалық сабақ өтті. Оған Ганюшкино, Атырау, Ақжайық, Махамбет, Мақат, Сағыз, Құлсары өндірістік-техникалық қызмет көрсету пункттерінің басшылары, нұсқаушы, техникалық оқыту шеберлері, слесарь-жөндеушілер мен аға вагон қараушылар қатысты.

Жалпы, талап бойынша вагон әуелі позицияға қойылады да, сосын бұрандалары ағытылып, ажыратылады. Осы процестің реттілігі мен қауіпсіздік ережелерін депо бастығының орынбасары Бақтыбек Мейрамов түсіндірді. Содан соң вагон арнайы электродомкратпен, арбашық арнайы кран-балкамен көтеріледі де ақаулы доңғалақ жұбына жиналған ішкі-сыртқы серіппелер ағытылып, түсіріледі. Жаңа қосалқы бөлшектермен доңғалақ жұбына жиналып, тележкаға салынады. Содан кейін тележка вагон астына қайта кіргізіліп, орнатылады. Бұл жұмысты депоның бас инженері Рашид Мұсабаев мамандармен бірге іс жүзінде көрсетті. Бұл жұмыста қиындық келтірген мәселе – шпинтоннды бұранда қақтан қатып қалған. Оны дәнекерлеу аппаратының күшімен қыздырып ағытты. Мұны Оразай Әбдіғалиев жасады. Талғат Қажиев, Кәміл Абдолов секілді слесарлар да көп жұмыс атқарды. Жалпы, мұндай жұмыстарға норматив бойынша 52 минут беріледі екен. Практикалық көрсетілім барысында мамандар осы уақыт ішінде үлгерді.  

Жалпы, станцияларға тәулігіне жүздеген вагондар келіп-кетеді. Вагон қараушылар оларды тексеріп, ақау тапса, оны техникалық күтім не қызмет көрсету пунктіне жібереді. Ал слесарь, дәнекерлеуші, краншы, құрушылардан құралған бригада кешенді жөндеу жұмыстарына кіріседі. Бірақ мамандардың айтуынша, кран, домкрат сынды техникалық аппарат, құралдар әбден тозығы жеткен, өткен ғасырдағы ескі техника. Жыл сайын оларды жаңартуға тапсырыс берілгенімен, ауыстырылмай отыр. Сондықтан бар күш мамандардың біліктілігіне түсіп, кәсібилігіне сын болмақ.