Теміржол тармақтарын пайдаланушы кәсіпкерлерге құқықтық көмек көрсетілді
Атырау облысы бойынша меншікті тілші
Атырау жүк тасымалы бөлімшесінде ҚР Жемқорлыққа қарсы іс-қимыл агенттігінің Атырау облысы бойынша департамент қызметкерлері Н.Жахин мен Б. Оразов теміржол тармақтарын пайдаланушы кәсіпкерлермен кездесу өткізді.
Жиынға аймақтағы станция басшылары мен жүк қабылдап-жөнелтуші тармақ иелері, кірме жолдарды пайдаланушы кәсіпкерлер қатысып, оларға «Атамекен» ұлттық палатасымен бірлесе «Бизнеске жол» жобасының маңызы түсіндірілді.
Жобаның мақсаты – кәсіпкерлерге әкімшілік кедергілерді еңсеруге көмектесу, құжаттарды ресімдеу кезінде әуре-сарсаңға салуды болдырмау, мемлекеттік қызметшілер қабылдайтын шешімдердің мерзімдері мен ашықтығын сақтауды қамтамасыз ету. Яғни, жерді жалға алу, су, газ, жарық тарту үшін техникалық құжат рәсімдеуден, мемлекеттік сатып алу келісім-шартына қол қоюдан негізсіз бас тартылса, есеп-шотқа заңсыз ауыртпалық салынса, заңсыз тексерілсе, сондай т.б. жағдайларда кәсіпкерлерге көмек беруді көздейтін жоба.
Отырыс ашық диалог форматында өтті, кәсіпкерлер мемлекеттік қызметтерді алу кезіндегі негізсіз, әкімшілік кедергілерге қатысты сұрақтар қойды. «Рауан-Налко» ЖШС өкілі М.Нажиев темір жолда қағазбастылық әлі де көп екенін алға тартты. Оның айтуынша, теміржолдың белгілі бір бөлігін иеленуші «Центротранссервис» (ЦТС) мекемесімен ай сайын келісім-шарт жасалады. Неге олай? Бұрын жылына бір рет жасалатын. 200-дей клиентпен ай сайын келісім-шарт жасай бергеннен кім ұтады? «Құлсары-Болашақ» ЖШС өкілі вагонға қатысты шағымын жеткізді. Айтуынша, Ақтөбедегі «Көктас» мекемесі жартылай ашық вагондарды қажетіне қарай емес, бірден 40 вагон ал деп ұсынады. «Мен оны қайда сыйғызамын, оның бәріндегі жүкті бір күнде түсіру мүмкін емес. Бізге қажеті 18 вагон. Ал қысқы мезгілде жартылай вагондар тіптен тапшы. Біресе көп, біресе вагон жетіспейді, реттілік жоқ» дейді. Бөлімше басшысы А.Базарғалиевтің түсіндіруінше, қысқы мезгілде жартылай ашық вагондар негізінен көмір тасымалына жегілетіні жүк жөнелтушілерге ескертілген. Ал басқа облыс аумағында вагондармен келісу ол кәсіпкердің өз жауапкершілігінде. «Атырау жүк тасымалы бөлімшесінде вагон берілмей, станциялар қабылдамай жатса, барлық станция басшылары осы жерде отыр, сауалыңызға жауап береді. Бірақ өзге өңір үшін жауап бере алмаймыз» деді ол.
Жиында сөз болған тағы бір маңызды мәселе – цифрландыру. Б.Оразовтың айтуынша, ол сыбайлас жемқорлыққа жол бермейді, қандай да бір лауазымды тұлғаға тәуелділік болмайды. Барлық құжаттамалар, келісім-шарт, алыс-беріс, жүк қабылдау-тапсыру құжаттары цифрлы түрде жүзеге асырылуы тиіс. Сол мақсатта «Атамекен» кәсіпкерлер палатасымен бірлесе мобильді топ құрылған. Олардың мақсаты – кәсіпкерлерге құқықтық және басқа да көмек беру. Бұған дейін Қазақстанның кей өңірлерінде «ҚазТемірТранс» АҚ вагондарды беруде алалық танытқаны БАҚ-та айтылған болатын. Компанияның Атырау филиалының өкілі Саламат Төлегеновтің айтуынша, бүгінгі күнде вагондармен жеткілікті түрде қамтамасыз етіп отыр. Филиал Атырау және Маңғыстау жол бөлімшелерімен бірлесе жұмыс жасайды. Магистральдық тораптың 2099,4 шақырым аралығындағы теміржол қозғалысының үзіліссіз, қауіпсіз қызметін үнемі ұйымдастыру жолында қызмет жасап, ел экономикасының бәсекеге қабілеттілігін одан әрі арттыруға ден қоюда. Негізгі жүк жөнелтушілер: «Иси Гипс Индер», «Индер тұз», «Карат», «Шевронмұнайгаз», «Рауан Налко» ЖШС, т.б. Вагондар беруде ешқандай ала-құлалық жоқ. Электронды АСУ ДКР жүйесі жұмыс жасап тұр.
Антикор өкілдері бүгінгі басқосу мақсаты кәсіп иелерімен кері байланыс орнатып, құқықтық негізде көмек беру, қандай да бір келеңсіздіктерді болдырмау, олардың алдын алу екенін жеткізді. «Шешілмей жатқан мәселе болса, хабарласыңыздар, келіңіздер. Бірлесе отырып, мәселенің түйінін тарқатайық», – деді жиын соңында.