Никотиннен витаминге көш!

Жамбылдық жас теміржолшылардың ұйымдастыруымен «Никотинді витаминге ауыстыр!» акциясы өтті. Бұл күні ертеңгілік жұмысқа асыққан теміржолшылар Жамбыл бөлімшесінің әкімшілік ғимаратының кіреберісіндегі тосын жайға тосырқай қарағаны рас...

Алайда, мән-жайды білген соң «зиянды әдеті» барлардың бірі қалтасындағы темекісін шығарып, бір-екі талын апельсинге айырбастап ары қарай кетсе, енді біреуі темекіні қорабымен мыжып тастап жатты. Қалай дегенде де, көптен бері темекіні қоямын деп жүргендері үшін бұл жақсы бастама болған сыңайлы, «Болды, осымен доғарамын» дегендер де болды. Апельсин біткен соң қызметкерлер аулаға шығып, темекінің зияндылығы жөнінде әңгімелеп берген спорт нұсқаушыларының бастауымен таңғы денешынықтыру жаттығуын өткізді.  

– Біз бұл жайында алдын ала хабар берсек, көп азаматтың бүгінгідей әсері болмас еді. Сондықтан тосыннан келіп, қызметкерлердің санасын сілкіп, салауатты өмір салтын насихаттауды мақсат еттік. Психологтар да кейде осындай әрекетке барудың тиімділігін айтады, – дейді Жамбыл бөлімшесі кадрлар бөлімінің басшысы Меруерт Бейсенбекқызы.