Теміржолшылар ұлттық мерекені бұқара халықпен бірге тойлады
Атырау облысы бойынша меншікті тілші
Ұлыстың ұлы күні – Наурыз мейрамы Атырау жүк тасымалы және магистральдық желі бөлімшелерінде кең көлемде аталып өтілді.
Атырау, Мақат, Ганюшкино, Аққыстау және тағы басқа станциялары мен Исатай-Махамбет орталық алаңында, Вокзал маңы шағын ауданында теміржолшылар киіз үй тігіп, ұлттық мерекені бұқара халықпен бірге тойлады.
Бұл күні ұлттық киім киіп шыққан теміржолшылар ұжымы алдымен спорттық сайыстарды тамашалады. Кір тасын көтеру, асық ату, арқан тартысудан жарыс ұйымдастырылды. Жастар жағы алтыбақан теуіп, шат-шадыман болды. Ардагер-теміржолшылар да құтты қонақ ретінде ұлттық тағамдар – наурыз көже, бауырсақ, қуырдақ, құрт, ірімшік, қазы-қарта, жал-жая секілді тағамдардан дәм татып, ақжарма тілектерін арнады.
Сондай-ақ бұған дейін бірін-бірі көрмеген теміржолшылар көрісіп, «Ұлыс оң болсын, ақ болсын», «Жылдан аман, айдан есен», «Жаңа жыл құтты болсын» айтысып, мәре-сәре болысты. Наурыз мейрамы қай жерде өтсе де, теміржолшылар оң пейіл, жарқын жүзбен қауышып, көңіл көтерді.
