Көктемгі комиссиялық байқау басталды

Атырау жүк тасымалы бөлімшесінде көктемгі комиссиялық байқау биыл жылдағыдан ертерек басталмақ. Ол наурыз айының 26-нан 12 сәуірге дейін жалғасады.

Тексеріс барысында қозғалыс қауіпсіздігі, еңбек қорғау және қауіпсіздік техникасы, техникалық құралдардың, ғимараттардың жай-күйі, байланыс, электр құралдарының жағдайы, вагондардың жайы, темір жолдың қазіргі күйі, сондай-ақ теміржолшылардың білім мен біліктілігі, жеке мәселелері, проблемалары да қаралады. «Комиссия құрамында барлық сала мамандары болады. Тексеріс арнайы локомотив арқылы жүзеге асырылады. Ең әуелі Ганюшкино – Д.Нұрпейісова телімі бойынша басталып, Ганюшкино – Исатай, Исатай – Қызылжар телімдері, содан кейін Махамбет, Атырау, Теңдік, Ақжайық, 496- 402 разъезд аралығы, Құлсары-Бейнеу, Мақат-Құлсары, Сағыз-Мақат телімдері, телімдердегі жол, сигнализация, электрмен қамту дистанциялары, вагон, локомотив деполары, т.б. қаралады. Сол жерлерде талқылау жұмыстары да жүргізіледі» дейді Атырау жүк тасымалы бөлімшесінің өндірістік-техникалық бөлім бастығы А.Айжарықов.  

Өткен жыл қорытындысымен аймақта пойыз және маневрлік жұмыстарда өндірістік жарақат алу болмаған. Бөлімшеде пайдаланым көрсеткіштерін орындау бойынша да нәтижелер жақсы деңгейде келе жатыр. Бұған дейін құрылымдық бөлімшелердің өз ішінде көктемгі тексеруге дайындық деңгейі, пойыздық және маневрлік жұмыстарда ақау, өндірістік жарақат алу жағдайы, қозғалыс қауіпсіздігі, еңбек қорғау және қауіпсіздік техникасы, техникалық құралдардың жағдайы, ғимараттардың абаттандырылуы, жұмысшылардың тәртібі қаралған. Көктемгі байқау нәтижелері сәуір айының соңында болатын жалпы қорытынды жиналыста жария болмақ.