Ақтөбеде Ұлыстың ұлы күні ұлықталды

«Көрген де, көрмеген де арманда» дейтін наурыз-думан Ақтөбеде де өтті. Ұлыстың ұлы күнін ұлықтаған шаралар өңірдегі барлық теміржол мекемелерінде жалғасты.

Қаладағы зәулім теміржолшылар ғимаратында ертемен шырқалған «Наурыз-думан» әні көпшілікке мерекелік көңіл-күй сыйлап, жан-жақтан ағылған теміржолшылар құшақтасып көрісіп жатты. «ҚТЖ-Жүк тасымалы» ЖШС Батыс аймақтық филиалының директоры Бөріхан Сматуллаұлы әріптестерін құттықтап, ізгі тілегін жолдады.  

Әр бөлімше жеті түрлі дәмнен дайындалған наурыз көжелерін ұсынып, қонақтар ұлттық тағамдардан дәм татып, үлкендерден бата алды. Ал теміржол вокзалының маңына ақшаңқан киіз үйлер тігіліп, алтыбақан құрылды. Әр мекеменің ауласында жалғасқан мерекелік «Сүйінші», «Шашу», «Қымыз мұрындық», «Бесікке салу», «Беташар», «Тұсаукесер», «Құда күту» сынды ұлттық салт-дәстүрлерден театрландырылған қойылымдар көрсетіліп жатты...  

Сонымен қатар, теміржолшылар тіккен киіз үйлер арасында сайыс өтіп, «Сәнді отау» номинациясы бойынша «Абылай хан ауылы» атауымен отау тіккен ШЧ-4 мекемесі үздік деп танылды.  

Ақтөбе темір жол вокзалында бұл күні жолаушыларға наурыз көже мен бауырсақ таратылды. Әз Наурыздың шын мәніндегі халықтық мерекеге айналғаны көрінді. Мерекелік көңіл-күйге енген жолаушылар да риза болып аттанды.  

Ал Ақтөбе белгі беру және байланыс дистанциясында барлық салт-дәстүрден қойылым көрсетілді. Келін түсіру, беташар, бата алу, сыңсу айту, құрсақ шашар, бесікке салу, тұсаукесер секілді ұлттық дәстүрлер паш етілді.

Сонымен қатар қиқулатып ұлттық ойындар да ойнатылды. Асық ату, арқан тарту, тоғызқұмалақ, кір тасын көтеру секілді спорт ойындары көпшіліктің көңілінен шықты.