«Алтын қорға» айналған кітапхана

Ақтөбе темір жолының техникалық кітапханасында 12 мыңға жуық кітап қоры бар. Мұнда нұсқамалық және әдістемелік кітаптардан бөлек сирек кездесетін салалық оқу құралдары, мерзімдік баспасөз тігінділері, сонымен қатар тарихи шығармалар мен көркем әдебиет те бар.

Теміржолшылар отырған ғимараттың бірінші қабатында орналасқан кітапхана оқырмандарға есігі әрқашан ашық, кіргеннен тек кітаптан шығатын ерекше спецификалық иісі баурап алады. Сондықтан жергілікті теміржолшылар мен студенттер жиі бас сұғатын орын.  

«Кітапхана – білім ошағы. Сансыз сұрақтардың жауабын кітапханадан іздеп таппасаң, қайдан табасың? Сондықтан біздің жұмыс қызу да қауырт жүріп жатады. Орталыққа тоқсан сайын есеп береміз. Келген кітаптарды электронды бағдарлама арқылы тіркеп отырамыз. Тұрақты оқырмандарымыз бар», – дейді техникалық кітапхананың бас кітапханашысы Базаргүл Жамалова.  

Бас кітапханашының айтуынша, келгендердің сұраған кітаптарын арнайы программа арқылы тауып беру мүмкіндігі бар. Бірде тіпті дипломдық жұмысына материал іздеген студенттің жоғын бүкіл кітапханашылар іздеу салып, бір-бірімен хабарласып жүріп тауып беріпті. Сондай-ақ «Қазақстан теміржолшысы» газетінің әр санын оқу үшін ғана арнайы келетін ардагерлер де осы жердің тұрақты «тұрғындары» екен.  

«Теміржолшылар арасында Ерлан Шуданов, Светлана Кембаева есімді тұрақты оқырмандарымыз бар. Олардың кітапқа деген қызығушылығы ерекше, әрбір жаңадан келген дүниені елдің алдымен оқиды, олардың сұрағанын дереу тауып беруге тырысамыз, оқырмандарымыз кітапхананы «теміржолдың алтын қоры» атайды, біз үшін одан өткен марапат жоқ», – дейді бас кітапханашы.