Қандыағаш станциясының өз ұстаханасы бар (Фото)
Ақтөбе облысы бойынша меншікті тілші
Төрт тарапқа қызмет көрсетіп тұрған Қандыағаш станциясының өз ұстаханасы бар. Күніне 30-40 тежегішті дәнекерлеп отырған, темірден түйін түйген шебердің жұмысына тәнті болдық.
Тоғыз жолдың торабында тұрған кластан тыс сұрыптау станциясында жүк айналымы аса қарқынды. Аймақтағы ірі компаниялармен жұмыс істейтін станцияда ГАЦ-АРС жүйесімен жабдықталған сұрыптау дөңесі, үш маневрлік аудан, автоматтандырылған басқару жүйесі бар. Жүк тасымалы бойынша рекордтық көрсеткіштерге қол жеткізіп келеді.
Осындай қарбалас жұмыс қайнап жатқан станцияның бір бұрышында ұстахана тұр. Кіргеннен көзге шалынатыны – қаздай тізілген тежегіштер. Бірнеше қатар жиналып тұр. Әрі қарай ұстаның пеші, дәнекерлеу бұрышы тұр.
Ұста Ғали Рысқұлов отқа қызған темірді сол қолындағы қысқышпен қысып, төстің бетіне қойып оң қолындағы балғамен ұрып түзетіп жатыр.
«Әр күнде 30-40 тежегішті қыздырып, түзетіп, денекерлейміз. Бір тежегіштің салмағы 7 келі болады. Жөндегендерді санап, дайындап, журналға тіркеп қоямыз. Жарамайтындарын кесіп, металлоломға жібереміз. Жалғыз тежегіш емес, станциядағы басқа да шаруашылық бұйымдарын қалпына келтіремін. Сынған отырғыштарды бекітеміз. Тежегіштер қоятын тіреуіштер майысса да осында жөндеуге әкеледі», – дейді Қандыағаш станциясының ұстасы Ғали Рысқұлов.
Салада 20 жылдай тәжірибесі бар маманның айтуынша, бүгінде ұсталық жасайтындар көп емес, себебі техника жетістіктеріне сүйенген өндіріс орындары оны кешегі кәсіп көреді. Бірақ ескіден жаңа, жоқтан бар жасайтын ұсталық кәсіп ешқашан өлмейді, ата-бабамыздан келе жатқан өлмес мұра деп санайды Ғали Рысқұлов.
