Кассалар қызметіне жүгінетіндер әлі де көп

Алда жазғы тасымал. Вокзал шаруашылығы жанданып, кассалар қызметінде қарбалас басталатын кез.

«Жолаушылар тасымалы» АҚ «Оңтүстік» филиалына қарасты Тараз теміржол вокзалының аға билет кассирі Айсұлу Әбілдаеваның айтуынша, жаз айларында туристік шаһар көне Таразға келушілердің қатары да артады екен.  

– Сондықтан біз қызметкерлерді жаз айларына дейін толық еңбек демалысына шығарып аламыз. Жазда жұмыс қызып қарбалас басталғанда адам жетіспей қиындық туындауы мүмкін. Әрине, бүгінде республика бойынша тұрғындардың 73 пайызы билетті электронды түрде алады. Дегенмен бұл кассалар алды босап қалды деген сөз емес. Кассалар қызметіне жүгінетіндер әлі де көп. Сонымен қатар оңтүстік өңірде электронды билет алу басқа өңірлерге қарағанда баяу екенін мойындау керек. Бізде жаз айларында «топтық тасымалға» сұраныс артады. Яғни лагерь, спорттық жарыстарға аттанушыларға, әскерилер мен төтенше жағдай, денсаулық сақтау саласына топтық қызмет көрсетіледі. Бұдан бөлек «Профсоюз Тараз» туристік фирмасының тапсырысы жоғары. Мерекелік күндері қосымша рейстер шығады. Ал жаз айларында билет тапшылығын реттеу бойынша 27 мамырдан «факультативті» рейстер дайындалады. Ол бес күн бұрын жасақталады. Бірақ билеттерге портал ашылған сәтте біз бәсекелес жеке кассалардың да бар екенін ұмытпаймыз. Оларда билеттің құны 500 теңгеге қымбат болса да бірден өтіп кетіп, билет тапшылығы туындап жатады, – дейді салада 27 жылдан бері жұмыс істеп келе жатқан Айсұлу Қырықбайқызы.  

Тараз вокзалының кассаларында ардагерлер мен мүгедектер үшін барлық жағдай жасалған. Бүгінде вокзалда тәулік бойы 2 кассада 8 маман жұмыс істесе, Боранды бекетінде – 4, Жаңатаста – 1, Түрксібте – 3, Шуда – 4, Шығанақта – 2, Сарышағанда 2 билет кассирі жұмыс істейді.  

Жазғы тасымалға сақадай сай дайын отырған вокзалдар міндеті – жолаушы халыққа лайықты сервистік қызмет көрсету.