Ақтөбеде болат дайындамалары шығарылатын болды
Ақтөбе облысы бойынша меншікті тілші
Ақтөбеде арнайы болат дайындамалар шығаратын теміржол кластері құрылады. Жоба құны 470 млрд теңгені құрайды.
Орталық коммуникациялар қызметінде өткен баспасөз мәслихатында Ақтөбе облысының әкімі Ералы Тоғжановтың баяндауынша, өңірге инвестициялар тарту және қолайлы инвестициялық климат құру бағыттары бойынша қолға алынған бұл жобаның болашағы зор. Оның аясында елімізде алғаш болаттың арнайы дайындамаларын шығаратын кәсіпорын бой көтереді. Зауыт шет елдерден жыл сайын 1 млрд долларға сатып алынатын арнайы болат дайындамаларын өндіреді және импортты алмастыруға мүмкіндік береді деп күтілуде.
Сондай-ақ 800 метрлік жіксіз рельстер шығаратын «ПЗТМ LTD» ЖШС жұмысты бастайды. Жоба құны – 21,4 млрд. Сонымен қатар жоғары технологиялық темір жол дөңгелектерін шығаратын зауыт іске қосылады. «Ақтөбестил» ЖШС өңірде теміржол шаруашылығын арттырып, импорт тауарлардың орнын басады деп күтілуде. Жоба құны – 168 млрд теңге.
Облыс әкімі құрылыс жұмыстарының құнын төмендетуге ықпал ететін цемент зауытын да салу жоспарланып отырғанын айтты. Өңірдегі тасымал жұмыстарының дені теміржол қызметінің еншісінде. Бершүгірдегі 12 қиыршық зауытының өнімдері түгелдей теміржол арқылы тасымалданады.