Балалар өлке тарихымен танысты (Фото)
Ақтөбе облысы бойынша меншікті тілші
«ҚТЖ-Жүк тасымалы» Батыс аймақтық филиалының директоры Бөріхан Беркімбаев теміржолшылардың балаларымен жергілікті мұражайды аралады. Өңірдің бас теміржолшысы халықаралық балалар күніне орай өткен кездесуде оларды теміржол тарихымен таныс болып, ата-аналарының кәсібіне терең бойлауға шақырды.
Батыс Қазақстан теміржолының тарихы ғана емес, мәдениеті, тұрмысы, елдің теміржол саласын қалыптастырған тау тұлғалы ардагерлердің еңбегі... Ақтөбедегі теміржол мұражайынан өткен күннің иісі бұрқырап тұр. Өткен күннен сыр шерткен ғасырлық тарихы бар жәдігерлер балаларға ерекше әсер етті. Әсіресе ескі паровоз, ағаш вагондар макеті, ескі теміржолшылар формасы, қызығушылықтарын арттырып, қолмен ұстап көрді. «Құрметті теміржолшы» марапатының алғашқы нұсқасына дейін сақталған екен. Ақтөбе теміржол вокзалының алғашқы нұсқасы, басқа да теміржолға қатысты фотоматериалдар, макеттер, сызбалар, диаграммалар мен карталар қызығушылық туғызбай қоймады.
«Қазіргі таңда мұражайды 380-нен аса құжат пен экспонат бар. Батыс Қазақстан теміржол басқармасы басшысының бұйрығымен 1989 жылы жасақталған музейдегі жәдігерлер жергілікті теміржолшылардың күшімен, көмегімен жиналған», – деп таныстырды мұражай қызметкері Анар Жұбаева.
Тарихи мекеннің төрт бірдей залын асықпай аралаған балалар Тәуелсіз Қазақстандағы жетістіктер – Қазақстанда баламасы жоқ Ақтөбе рельс-арқалық зауыты, Алтынсарин – Хромтау теміржолы, Бейнеу – Жезқазған магистралінің Шалқар – Тассай учаскесі бейнеленген макеттерді де қызыға тамашалады.
Бөріхан Сматуллаұлы өз кезегінде балаларға олардың ата-аналары, ата-әжелері еңбек еткен сала, теміржолшы кәсібі, түрлі мамандықтар туралы әңгімелеп берді.
«Батыс Қазақстан темір жолының тарихы, сендердің әкелерің мен аталарыңның еңбек жолы міне, осы жерде тұр, ертең сендердің араларыңда да теміржолшы болғысы келетіндер табылады, сондықтан сендер үшін бұл алғашқы танымдық дәріс десек те болады», – деді Бөріхан Сматуллаұлы.
Балалар филиал басшысына түрлі сұрақтар қойып, өздерінің армандары туралы айтты. Шара соңында түрлі сыйлық пен тәттіге қарық болған балалар естелік суреттерге түсіп, ерекше әсермен тарасты.
