Әнші Қуандық Рахым теміржолшының ұлына ат мінгізді
Ақтөбе облысы бойынша меншікті тілші
Қазақстандық әнші Қуандық Рахым өзімен қосылып ән айтқан теміржолшының ұлына ат мінгізді. Ол шалғайдағы станцияда тұратын ауыл баласын Ақтөбедегі концертіне арнайы шақырған.
Әнші осыған дейін ауылға барғанында әннің ырғағына беріле орындаған ауыл баласының қылығы әлеуметтік желіде тарап кеткен еді. Әншінің тыңдармандары баланы іздеп табуды жарыса жазып, дуэт орындауды сұраған еді. Қуандық Рахым тыңдармандарының тілегін жауапсыз қалдырмады. Ақтөбе облысы Мөңке би ауылында тұратын қара баланы іздеп тапты.
– Әлеуметтік желіде қатты танылған балапанымыз бар. Ақтөбе облысы Шалқар ауданы Мөңке би ауылына концертпен барғанда бізбен қосылып «Аққуым» әнін шырқаған қара баланы қошеметпен сахнаға шақырамыз. Қадірлі ағайын, бүкіл Қазақстан осы сәтті күтіп отыр. «Қара баламен бірге видео салыңызшы», «сізбен сахнаға шыққанын көрейікші» деп әсіресе аталар, әжелер, апалар тағатсыздана күтіп отыр. Халықтың алдында Бақытбек бауырыма өз атымнан ат мінгіземін. Осы жерде ата-анасы бар, ұстаздары бар, кез келген уақытта тұлпарыңды жеткізіп беремін, – деді Қуандық Рахым.
Әнші ауыл баласына болашақта тек Ақтөбенің ғана емес, Қазақстанның атын шығаратын абыройлы бол деген тілегін білдірді. Мөңке би ауылындағы мектептің 7-сынып оқушысы Бақытбек Берікұлы теміржолшының ұлы. Әкесі станцияда жұмыс істейді. Дені теміржолшылар тұратын ауыл тұрғындары үшін бұл үлкен жаңалық болды.