Семейдегі «Бейбітшілік аралына пойыз қатынайды

Алдағы уақытта Семейдегі Ертіс өзенінің ортасындағы «Бейбітшілік» аралына пойыз қатынасын жүргізу қолға алынбақ. Бұл аралда ертеректе, яғни кеңес дәуірінде балалар пойызы болған. Ал жаңадан ашылатын бұл пойыз қалалықтардың барлығына да ортақ болмақ.  

Бұл жоба  жайында Абай облысы әкімінің көшпелі брифингі барысында БАҚ өкілдеріне кеңінен айтылды. Жергілікті атқарушы билік жолаушы тасымалын жүзеге асыруда автокөліктен жылжымалы құрамға ауысу шараларын қолдайды.

Қазіргі мәліметтерге сүйенер болсақ, рельстерді төсеу келер жылы қолға алынатын болды. Бүгінгі таңда топографиялық жұмыстар толық аяқталыпты. Сонымен қатар облыстық әкімдік тарапынан электр энергиясымен жүретін заманауи «паровоз» да сатып алынған. Ал оған лайықталған арнайы вагондар қазіргі таңда даярлану үстінде. Көп ұзамай Семей станциясына жеткізілетін болады.  

Сөз болып отырған ерекше жылжымалы құрам жаяу жүргіншілер көпірінен бастап, аралдағы барлық маңызды нысандар аралығында тұрақты қатынайтын болады. Атап айтсақ, Семей ядролық сынақ құрбандарын еске алуға арналған «Өлімнен де күшті» монументі, биологиялық орталық және аралдағы жағажай мен жеке сектордағы тұрғындарға да тұрақты түрде қызмет көрсетпек. Пойыздың іске қосылуымен аралға қатынайтын автокөлік қатынасына шектеу қою шаралары көзделуде. Ондағы басты мақсат – семейліктердің сүйікті демалыс орны саналатын, ерекше табиғаты бар әрі тарихи мәнге ие арал келбетін сақтап қалу болып отыр.    

Жалпы, аталмыш шара Семей өңірі бойынша қала маңы тасымалын дамыту шаралары аясында қолға алынып жатыр. Бұл орайда алдағы уақыттағы жүзеге асырылатын тағы бір келелі шара Семей – Шар станциялары арасындағы аптасына тұрақты түрде алты мәрте жүретін жолаушылар пойызын желі бойына шығару болып отыр. Болжамды шара таяу аралықта жүзеге асырылмақ.