Ақтөбелік жолшылар жаңа техника алды (Фото)
Ақтөбе облысы бойынша меншікті тілші
«ҚТЖ» ҰК» АҚ «Ақтөбе магистральдық желі бөлімшесі» филиалының Ақтөбе жол дистанциясында айтулы оқиға. Жолшылар мен олардың құрал-саймандарын тасымалдауға арналған су жаңа жол талғамайтын жүк көлігі дистанцияның Ақкемер станциясындағы №11 желілік теліміне жеткізілді.
DONGFENG маркалы жүк көлігін жолшыларға салтанатты түрде табыстап, қуаныштарына ортақтасқандар қатарында Ақкемерге Ақтөбе жол дистанциясының басшысы Кеңес Нұртаевпен бірге «Қазкөліккәсіп» ҚБ «Батыс» филиалының төрағасы Ғабит Садықов, тағы басқа лауазымды тұлғалар арнайы барды.
Жол күтіміне жауапты жолшылар Қытайда жасалған, іші кең, жүргізушіден бөлек алты адам еркін сыятын, артында құрал-сайман салатын бөлек борт бар, қыста жылы, жазда салқын болатын кондиционер мен бейнебақылау жүйесімен де жабдықталған су жаңа заманауи техниканы қызықтап риза.
Ақтөбе жол дистанциясының Тамды-Ақкемер станциясы аралығындағы жол күтіміне жауапты №11 телімінің жол шебері Ізгілік Тілесов жолшылар жұмысының жеңілдейтінін айтып қуанды.
– Мұнда екі бригадада 13 адам жұмыс істейді. Күндіз-түні жол күтімін жасап, қауіпсіздікті қамтамасыз ететін жолшыларға мұндай көлік ауадай қажет. Жаңа көлік еңсемізді көтеріп тастады. Енді жұмыстың өнімділігі де арта түсетін болады, уақыт та үнемделеді, – деп қуанышымен бөлісті жол шебері.
Жақын күндері аймаққа тағы осындай екі техника жеткізілетін көрінеді. Бұдан бөлек жол бойындағы теміржолшылар игілігіне жылжымалы модульдік ғимарат іске қосылады.
– Инвестициялық бюджеттен жұмысшыларды тасуға арналған үш техника алу қарастырылған. Жолдағы жұмысшылардың жағдайын жақсартуға бағытталған әлеуметтік бағдарламаға сай алынды. Біріншісі келді. Енді қалғанын да кезекпен алып, тарататын боламыз. Бұдан бөлек Ақтөбе жол дистанциясына биыл 58 домкрат және басқа да шағын механизация құралдары алынғанын айта кетейік, – деді Ақтөбе жол дистанциясының бастығы Кеңес Нұртаев.
