Теміржолда 45 жыл еңбек еткен Алтай Көбегенов құрметті демалысына шықты
Атырау облысы бойынша меншікті тілші
Қырық бес жыл өмірін өлке шойын жолының өркендеуіне арнаған азаматтың бірі – Атырау станциясының бастығы Алтай Көбегенов. Құрметті теміржолшыны әріптестері құрметпен зейнет демалысына шығарып салды.
Атырау қосалқы бөлімінің бастығы Аслан Базарғалиев табан аудармастан 45 жыл еңбек еткен Алтай Көбегеновке ақжарма тілегін білдіріп, ұжым алдында оған Алғыс хат пен естелік сыйлық табыс етті.
Зейнеткер ағамыз еңбек жолын Ақтөбе теміржол бөлімшесінде №142 бекет кезекшісінен бастаған. Жұмысқа біраз жыл машықтанған соң оқуды ойлап, институттың күндізгі бөліміне құжат тапсырады. Алматы теміржол көлігі инженерлері институтын «Теміржол көлігін ұйымдастыру және басқару» мамандығы бойынша бітіріп, жолдамамен Атырауға келеді.
Теміржолшылар отбасынан шыққан ол әулеті салған сүрлеуде еңбек жолын жалғастырып, теміржолдың түрлі қызметін абыроймен алып жүрді. Құлсары станциясында пойыз құрастырушы бола жүріп, дөңес кезекшілігіне ауысады. Кейін маневр, пойыз диспетчері, бас инженер, Мақатта станция бастығы лауазымдарын атқарады. Жылдар тезінде тәжірибе жинақтап, кәсіби маманға айналды.
Төрт жыл Атырау жол бөлімшесі бастығының бірінші орынбасары қызметінде жүргенде білікті басшы қатарынан табылып, жұмысты ұтымды ұйымдастыра білді. Мақат ауданы мәслихатының депутаты болғанда қоғамдық өмірге белсене араласып, ауданның күрмеулі әлеуметтік-экономикалық мәселелерін шешуге қажырлық танытқанын жұрт жақсы біледі. 2005 жылы «Адал еңбегі үшін» төсбелгісімен марапатталған Алтай Көбегеновтің суретін ҚТЖ-ның «Құрмет тақтасынан» да көре аласыз.
