Атырауда көрісу мерекесі тойланды
Атырау облысы бойынша меншікті тілші
14 наурыз – Көрісу күні батыс өңірде кең таралған дәстүр. Бұл күні жаңа ай туды, көктем келді деп есептелінеді. Халық қыстан аман-есен шыққанына қуанып, бір-бірімен қол алысып, төс қағыстыра амандасады. Еліміздің Батыс өңірінде бұрыннан бар бұл дәстүр әлі күнге жалғасып келеді.
Атырау әуежайы мен теміржол вокзалында, қоғамдық көліктерде халықтың көңілін көтеру мақсатында домбыра-сырнаймен ән айтылып, ақ мол болсын деп жолаушыларға шұбат пен бауырсақ ұсынылды. Көрісу күніне орай Атырау облыстық тарихи-өлкетану музейінде «Көрісу – жыл бастауы» атты мәдени-көпшілік шара өтті. Ақсақалдар ақ батасын беріп, жас келіндер қонақтарға шашу шашты.
Барлық темір жол мекемелерінде де көрісу мерекесі аталып өтеді. Атырау жүк тасымалы және магистральдық желі бөлімшесі кәсіподақ комитетімен бірлесе көрісу салтын ұйымдастырды.
«Жұмыс аптасы басталар шақтағы таңғы 8-де дастархан жайылып, ұлттық тағам түрлері – қымыз бен шұбат, бадана бауырсақ, сүзбе мен жент, тағы басқа тәттілер қойылды. Ұлттық киім киген қыз-жігіттер келушілерге дәм ұсынып, қызмет етті. Қызметкерлер, жан-жақтан желіден келген жұмысшылар бір-бірімен көрісіп, мәре-сәре болысты. Үлкендер жағы «Көрісу салты құтты болсын, жыл басымен!», «Жылдан жылға аман жетейік!» деп баталарын берді», – дейді кәсіподақ төрағасы Боранбай Қамиев.
Желі бойындағы теміржолшылар да бұл мерекеден қалыс қалған емес. Ганюшкино, Дина Нұрпейсова, Аққыстау, Мақат, Құлсары, Сағыз, т.б. станциялар мен разъездерде теміржолшылар жұмыста бәрі бір-бірімен қол алысып, төс қағыстырып көрісіп, жыл басымен құттықтады.