Пойыздағы жолаушыларға Қыдыр ата ақ жол тіледі

Семейлік теміржолшылар қауымы шуақты мейрам Наурыз мерекесін атап өтуді бастап кетті. Бұл орайда жуырда жарияланған ұлттық мерекенің онкүндігі, «Наурызнама» тұжырымдамасы басшылыққа алынуда.

Көктемнің көрікті мерекесінің алғашқы лебі ең алдымен жолаушылар нөпірі көп Семей вокзалында сезілді. Ертегі кейіпкері Қыдыр ата бастаған бір топ жергілікті әнші-бишілер вокзал іші мен келіп тоқтаған жолаушылар пойызының вагондарын думанға бөледі.  

Мұндай тосын сыйды күтпеген жолсеріктер мен жолаушы халық ризашылықтарын білдіріп қошеметтеп қол соқты. Көпшілігі өнерпаздарға қосылып ән салып, би  билеп, наурыз думанды одан әрі қыздырды.

Десек те, мерекенің мәні тек ән-жырдан ғана тұрған жоқ. Вокзал перроны мен күту залындағы жолаушылар қауымына қазақтың төл әдет-ғұрыптары, салт-дәстүрлеріне қатысты түрлі викториналық сұрақтар қойылды. Атап айтсақ, «Бастаңғы», «Тоқымқағар», «Асар», «Ерулік» ұғымдары туралы түсініктері сұралды. Мұндай қызғылықты әрі танымдық мәні зор этнографиялық сауалдарға әсіресе аға буын өкілдері жақсы жауап берді. Жаңылыспай дәл жауап берген жолаушыларға арнайы сыйлықтар тарту етілді.

Сонымен қатар сапарға шығушыларға Қыдыр ата ақ батасын беріп, ақ жол тіледі.  

– Осынау ерекше іс-шараның басты мақсаты – ұмыт болып бара жатқан салт-дәстүрімізді қайта жаңғырту, ұлттық құндылықтарды дәріптеу. Наурызнама бойынша тойланатын әрбір күн, қазақ халқы үшін ерекше маңызға ие болмақ, – дейді бұл орайда мерекелік шараны ұйымдастырушылар.

Айта кетейік, аталмыш мәдени-рухани тұрғыдан маңызы зор шараны вокзал қызметкерлері «Абай облысының мәдениет, тілдерді дамыту және архив ісі басқармасына» қарасты Семей Мәдениет сарайының өнерпаздарының көмегімен бірлесіп әзірлеген болатын.

Десек те, бөлімшенің кәсіподақ комитеті Наурыз мерекесіне орай арнайы бағдарлама әзірлеп, іске асыруды бастап кетті. Оған мекемелер басшылары, Жастар ұйымының мүшелері, Ардагерлер кеңесі атсалысуда. Мерекенің негізгі шырқау шегі, салтанатты шара 22 наурыз күні вокзал алаңында өткізілетін болады.