Атырауда Наурыз мейрамы жалпыхалықтық сипат алды
Атырау облысы бойынша меншікті тілші
Ұлыстың ұлы күні – Наурыз мейрамы зор ықыласпен тойланатын нағыз халықтық сипаттағы салтанатқа айналды. Оның көрінісі Атырауда да байқалды.
Мереке орай Атырау қосалқы бөлімі мен магистральдық желі бөлімшесі кәсіподақтарының атсалысумен «Қош келдің, Наурыз мейрамы!» атты концерттік шара өтті. Бөлімше ғимараты маңындағы үлкен алаңда, атап өтілген мерекеде ұлттық салт-дәстүрді жаңғыртып ән айтылып, күй тартылды, түрлі ұлттық ойындар ойналып, наурызкөже таратылып, ақсақалдар бата берді.
Атырау қосалқы бөлім бастығы Аслан Базарғалиев пен магистральдық желі бөлімшесі бастығының міндетін атқарушы Амангелді Рахмеденов көпшілікті ұлыстың ұлы күнімен құттықтап, ізгі тілектерін жеткізді. Алаңға 16 қанат киіз үй тігіліп, онда қазақ халқының тұрмыс-тіршілігінде пайдаланатын барлық ұлттық бұйымдар қойылған екен. Қонақтар түрлі ұлттық тағамдардан дәм татып, пойыз құрастырушы, электромеханик, жолшы, байланысшы, машинист, вагон қараушы сынды нағыз теміржолшылардан құралған өнерпаздар ән мен жырдан шашу шашып, мың бұралған бишілер де ортаға шықты. Наурыз атауына қатысты викториналық сұрақтар қойылып, жеңімпаздарға сыйлықтар берілді. Түгел ұлттық киім киіп, кешке дейін серуен құрған наурыз мейрамы осылай жалпыхалықтық сипатқа ие болды.
