Атырауда қосымша пойыздар шығарылуда

Атырауда су тасқынына қарсы шаралар қарқынды  жүргізіліп жатыр. Облыста төтенше жағдай жарияланып, қауіпті аймақтан адамдар көшірілуде.

Жем өзенінің тасуы әсерінен Құлсары қаласының біраз бөлігін су басып қалып, қазірде халықтың күшімен су деңгейін төмендету жұмыстары жүргізілуде. Яғни, Ордабай, Қызылжар каналдарына қарай бағыттағы бөгетті жарып, суды сонда ағызып жатыр. Жайық өзені тасуы мүмкін болғандықтан қала-аудандарда да жағалауды бекіту жұмыстары қызу жүріп  жатыр.  

Теміржолшылар қосымша пойыздар шығаруда. Сәуірдің 5-күні қосымша Құлсары – Атырау пойызы жүргізіліп, алғашқы күні 385 адам, оның ішінде 99 бала қалаға жеткізілген. Бұл пойыз әлі де өз жұмысын жалғастыруда. Атырау қосалқы бөлімінің бастығы Аслан Базарғалиевтің айтуынша, 07.04 күні Құлсары –Маңғыстау бағытында қосымша пойыз шығарылып, оған 500-ге жуық адам мінген. Құлсарыға 3375 адамға көмек көрсетіліп, 1660 адам эвакуацияланған. Атыраудан Құлсарыға пойыз арқылы 7 сәуір күні 3 вагон ауыз су мен 4 вагон азық-түлік жеткізілсе, 8 сәуір күні тағы жиынтық материалдар тиелген (күрек, қапшық, құрал-саймандар, азық-түлік, сусындар, киім-кешек, гигиеналық заттар) гуманитарлық тағы жеті вагон жүріп кетті.  

Аймақтағы апатты ахуалға орай өңірге келген «ҚТЖ» АҚ» ҰК Басқарма төрағасы Н.Сауранбаев, орынбасары Қ.Әлмағамбетов, ЦЖС Рахметов Құлсары –Атырау аралығындағы темір жол мен көпірлердің жағдайымен танысып, штаб жиналысына қатысты. Жалпы алғанда, жағдай тұрақты бақылауда. Темір жол аман, пойыздар жүріп жатыр. Құлсары станциясы, басқа да құрылымдық мекеме жұмыстары штатты режимде жұмыс істеуде. Биікте тұрғандықтан ол жақты су баспаған. «Адамдарды пойыз арқылы тасымалдау, гуманитарлық жүктерді, автобензин жеткізу, т.б. шұғыл жұмыстарға теміржолшылар бір кісідей атсалысып, қолдан келген көмектерін жасап жатыр», – дейді Аслан Базарғалиев.