Техникалық дәріс өтті
Абай облысы бойынша меншікті тілші
Семей ЖТ бөлімшесінде теміржолшылар арасында түрлі мәселелер бойынша түсіндіру, ақпараттандыру жұмыстары тұрақты түрде жүргізіліп тұрады. Әсіресе жаңадан қабылданған ұжымдық шарт, еңбек қатынастары мен әлеуметтік жеңілдіктер өзекті тақырып болып тұр.
Жуырда кадр бөлімінің менеджерлері бөлімшенің ең ірі ұжымы саналатын, 200-ден аса қызметкері бар кластан тыс Семей станциясының теміржолшыларымен кездесу өткізді. Техникалық дәріс түрінде өткізілген басқосу барысында түрлі тақырыптар қозғалды. Әсіресе зиянды еңбек жағдайларына байланысты 55 жастан зейнеткерлікке шығу мүмкіндігі мен талаптары, 2024-2026 жылдарға арналған ұжымдық келісімшарт, сонымен қатар емдік шипажайларға жолдама алу бойынша мейлінше тың мағлұматтар берілді. Еңбекақы төлеу, мерекелер мен атаулы күндері берілетін сыйақылар көлемі, еңбеккерлерге арналған әлеуметтік пакет жайлы кеңінен сөз өрбіді. Қолайлы жұмыс орнын қалыптастыру, қызметтік киім, еңбек жағдайларын жақсарту да тыс қалмады.
Еркін диалог алмасу алаңын қалыптастыру үшін мұндай жиындарға басшылық тарап қатыстырылған жоқ. Сондықтан да болар, қарапайым қызметкерлер өз сауалдарын қысылмай қойып, жауап ала алды.
– Расында бұл мәселелердің барлығы осыған дейін айтылған болса да түрлі себеппен ақпараттандырылмаған қызметкерлер де бар екен. Сонымен қатар теміржолшылардың сауалдары да жиналып қалыпты. Негізінен сала қызметкерлері үшін әлеуметтік қолдау тақырыбы өте өзекті екендігін аңғардық. Жастар да, аға буын өкілдері де сұрақтар қойды. Барлық сауалдарға тұшымды түрде жауап қайтардық деп ойлаймын, – дейді бұл орайда бөлімшенің персоналмен жұмыс атқару бөлімінің менеджері Бекзат Кәрімханов.