Белгі беру-байланыс құрылғыларына күнделікті күтім жасалады
Қызылорда облысы бойынша меншікті тілші
Осы жылдың басынан бері Қызылорда белгі беру және байланыс дистанциясы тарапынан қозғалыс қауіпсіздігінің бұзылуына әкелген апатты оқиғалар орын алған жоқ. Дистанция басшысы Аман Кубенов жоспарлы жұмыстар кесте бойынша жүргізіліп жатқанын жеткізді.
Дистанцияның техникалық бөлімінің бастығы Нұрлан Жүсіпбаев берген мәліметке сүйенсек, өндірістік жұмыстар кезінде салалас мекемелерге тиісті құрылғылардың жұмыстан тыс қалуы себепті электр күшінің іркілісі бір мәрте тіркеліпті. Жұмыс кезінде негізгі сигнал беру құрылғыларының оқыс жабылып, жұмыстан тыс қалуы тіркелмеген, вагондарға жабысып немесе сүйретіліп келе жатқан бөгде заттардың бар-жоғын тіркейтін УКСПС, КГУ құрылғыларының белгі беруі болмаған.
– Белгі беру-байланыс құрылғыларына күнделікті күтім жасалады. Құрылғылар жоспарлы түрде жаңартылып отырғанмен, қызметі маңызды, көнерген құрылғылар ескірген, олар ерекше күтімді қажет етеді. Ауық-ауық жөндеуге түсетін кейбір құрылғылардың «жасы» жиырма жыл мен қырық жыл аралығында. Біздің механиктердің шебер қолдарының арқасында олар әлі күнге жұмыс жасап келеді, күтімі келіссе әлі де қызмет көрсете бермек, – дейді техникалық бөлімнің бастығы.
Айтуынша ЭЦ бағыт шеңбері, АБ перегоны және 600 шақырымға жуық аумақтағы байланыстың кабельдік желілері көптен ауыстырылмағандықтан ескінің көзі жәдігерге айналған. Көктем шыға дистанцияда жұмыс қызған, техникалық күтім және ағымдық жұмыстар барысында телімдерде кешенді жұмыстар жүргізген. Мәселен, Қызылорда станциясында 76 бағыттамалық бұрманың бағыттаушы қорабы және 39 бағыттамалық бұрманың СП-6 типті электрожетегі ауыстырылған. Осындай жұмыстар дистанцияның Шорнақ пен Жосалы станциялары аралығында да жалғасып жатыр.
