Теміржолшылар Абай елінде болды

10 тамыз – ұлы ақын, ағартушы, қазақтың жазба әдебиетінің негізін қалаушы ұлы Абайдың туған күні. «ҚАЗКӨЛІККӘСІП» ҚБ Семей өңірінің кәсіподақ ұйымының қолдауымен Семей ЖТ бөлімшесінің қызметкерлері ақын туған өлке – Жидебайға барып қайтты.

Абай, Шәкәрім, Мұхтар туған өлкенің тарихымен танысып, сол арқылы даналар шығармашылығы жайлы таным өрісін кеңейтуді көздеген сапар өте әсерлі болды. Теміржолшылар алдымен жол бойындағы Күшікбай батыр бұлағына ат шалдырды. Бұл жерде М.Әуезовтің «Қорғансыздың күні» шығармасындағы Ғазиза есімді кейіпкер өмір сүрген.  

Әрі қарай экспедиция мүшелері даңқты жазушы туып өскен Бөрілі өңірінде болып, әйгілі «Көксерек» оқиғасы өтетін жердің тарихымен де танысты. Қаламгердің мұражай үйіне кіріп, өткен ғасырдың тынысын сезінді. Сол тәрізді жол бойындағы Абай дүние есігін ашқан Қасқабұлақ елді мекенінде де аялдады. 

Десек те, ең әсерлі сәт Абайдың жайлауы болған, ақын шығармаларының басым бөлігі жазылған әйгілі Жидебай жерінде өтті. Онда хакімнің мұражай үйі мен кесенесі орын тепкен. Абай, Шәкәрім мазарын зиярат еткен сала қызметкерлері ұлылардың өткен өмірімен, шығармашылығымен танысты.  

Сонымен қатар аталмыш іс-шара аясында Абай мен Шәкәрім Құдайбердіұлының, Ақылбай, Мағауия Абайұлдарының шығармаларын жатқа айту бойынша байқау ұйымдастырылды. Нәтижесінде барлық қатысушыларға «ҚТЖ-ЖТ» ЖШС «Семей ЖТ бөлімшесі» филиалының кәсіподақ ұйымының төрайымы Айгүл Берікболова естелік сыйлықтар табыс етті.  

– 10 тамыз – Абай Құнанбайұлының туған күні. Бұл дата 2020 жылы үкімет қаулысымен Абайдың 175 жылдық мерейтойы қарсаңында ресми түрде енгізілді. Президент Қасым-Жомарт Тоқаев осы жылы Абай Құнанбайұлының 175 жылдық мерейтойын мерекелеу туралы жарлыққа қол қойды. Демек, ұлтымыздың бас ақынын құрмет тұтатын көпшілік үшін ерекше күн. Осы сапар жан дүниемізді рухани байытып, танымдық-тағылымдық тұрғыдан мол мағлұмат алдық, – дейді шараға қатысушылар.