Толаскез: бағыттамалық бұрмалар ауыстырылуда (Фото)

Жылдың қай мезгілі болмасын пойыздардың қозғалыс қауіпсіздігін сақтау үшін телім бойынан табылатын аймақ жолшылары жолдың бабын жасау жұмыстарын жалғастырып жатыр. Кеше Қызылорда жол дистанциясының жолшылары 14 бекеттің оңтүстік алқымындағы 3-бағыттамалық бұрманы ауыстырды.

Жолшылар ұжымы 12.40 минут пен 17.10 минут аралығында төрт жарым сағаттық толаскез алып, жұмысқа кірісті. Таңертеңнен бекеттің тақ жолындағы бұрманы ауыстыруға дайындық жасалып, толаскез уақыты берілген бойда, жол төсемінің беткі 20 сантиметрлік қабаты трактордың күшімен сүріліп алынды. Одан кейін жол табаны 40 сантиметр шамасында трактормен қопарып алынды. Трактордың жұмысын жеңілдету үшін қолына күрек, қайла ұстаған жолшылар да жолды дайындауға кірісті. Берілген уақытты ұту үшін Бірқазан телімінің жол шебері Талғат Шалабаев, бригадир Сәбит Ахметов, Тартоғай телімінен Бекзат Жұмаділов, Әділет Қожаберген, Сұлутөбеден Қайрат Надиров, Аңсат Мәлібек, Рахат Құрманәлі, Белкөл телімінен Ерболат Торанов, Асылхан Оразбеков, Қайырбек Ахметов, Қапар Раханов секілді жолдың бабын жасауда тәжірибесі мол жолшылар  тартылыпты. Жол төсемінің қабатын тиісті тереңдікте қазып тазарту, қиыршық тасты төсемнің белгіленген қалыңдықта салынуын қадағалау, көтергіш кранның, жол техникаларының үйлесімді жұмыс жасауын реттеу секілді ұйымдастыру жұмыстарына Қызылорда жол дистанциясы бастығының орынбасары Батыр Мамедалиев, 3-өндірістік телім басшысы Рүстем Досымов, телім басшысының орынбасары Диас Қажденов басшылық жасады.

– Қызылорда магистральдық желі бөлімшесінің басшылығы бекіткен жол картасына сәйкес бағыттамалық бұрмалардың жұмысын жақсарту мақсатында дистанцияның Екпінді, Төменарық, Қараиірім, 14-бекет, Бірқазан және Қызылорда станцияларындағы телімдерде пайдаланылған 9 жиынтық бағыттамалық бұрманы қайта салу жоспары қабылданған. Бүгінгі таңда 7 жиынтық бағыттамалық бұрма ауыстырылуға дайын болды. Бұрмаларды жаңартып-жаңғырту арқылы ауыстыру оларда болуы мүмкін кінәраттардың алдын алып, арқалықтар мен крестовиналардың қызмет ету мерзімін ұзартады. Бүгін ауыстырылуы тиіс бағыттамалық бұрмалардың бесіншісі ауыстырылуда. Алдағы уақытта қалған бұрмалар да рет-ретімен ауыстырлатын болады, – дейді Қызылорда жол дистанциясының бастығы Марат Оңалов.

Бұған дейін дистанция жолшылары Екпінді, Төменарық, Қараиірім бекеттерінде осындай толаскез өткізіп, бұрмаларды жаңалады. Толаскезде Қызылорда белгі беру және байланыс дистанциясының электромеханиктері, 14-бекеттің теміржолшылары және Қызылорда қалпына келтіру пойызының құрамы техникаларымен жұмыс жасады.  

Бағыттамалық бұрмаларды ауыстыру кезінде қауіпсіздік талаптарын қатаң сақтап, толаскездің уақытын тиімді пайдалану, кестемен өтетін пойыздардың қозғалысына кедергі келтірмеу басты назарға алынды. Бағыттамалық бұрма салынып болғасын жолдың сапасы технологиялық талаптарға сай болу үшін арнайы жол машинасы Унимат іске қосылып, жолдың бабы жасалады.