Құрметті теміржолшы Еркін Жананбаев «Ерен еңбегі үшін» медалімен марапатталды
Ақтөбе облысы бойынша меншікті тілші
Республика күні қарсаңында ақтөбелік Құрметті теміржолшы Еркін Жананбаев «Ерен еңбегі үшін» медалімен марапатталды.
Жананбаев Еркін Ынтағалиұлы «ҚТЖ-Жүк тасымалы» ЖШС Ақтөбе бөлімшесі филиалының Қандыағаш вагон пайдалану депосының бастығы. Бұл қызметті ол сегіз жыл абыроймен атқарып келеді. Қандыағаш вагон пайдалану депосындағы жұмыстың ұйымдастырылуына жауапты. Қарамағында 700-ден аса қызметкер бар. Төрт тарапқа қызмет көрсететін кластан тыс сұрыптау станциясында пойыздардың қозғалыс қауіпсіздігін қамтамасыз етуге ұжымымен бірге атсалысып келеді.
Марапат иесінің теміржол саласында еңбек етіп жатқанына 30 жылдан асып барады. Еңбек жолын вагон шаруашылығында слесарь боп бастаған ол жауапкершілігі мен ұйымдастыру шеберлігінің арқасында басшылық қызметке дейін көтерілген. Теміржолшылар әулетінен шыққан.
«Атам, әжем, әкем теміржолшы болған. Мен үшін теміржолшы болу мақтаныш. Бұл менің өмірім. Теміржолшылар еңбегі мемлекеттік деңгейде марапатталса, біз үшін қуаныш», – дейді Еркін Жананбаев.
Еркін Ынтағалиұлы 2021 жылы «Құрметті теміржолшы» медалімен марапатталған болатын. Мәртебелі марапат оның вагон шаруашылығына сіңірген үлкен еңбегіне берілген баға болатын. Ал теміржолшыға Мемлекет басшысы атынан «Ерен еңбегі үшін» медалін Ақтөбе облысының әкімі Асхат Шахаров табыстады.
«Республика күнін мерекелеу жалпыұлттық тұтастығымызды, қалыптасқан мемлекеттігімізді айшықтай түсетін бүкілхалықтық тарихи күн. Бүгінгі күні мемлекетіміз дамудың жаңа деңгейіне көтеріліп, әлемдік қауымдастықта лайықты орынға ие болды. Ең бастысы халқымыз тәуелсіздік алғаннан бері тыныштық пен тұрақтылықта бейбіт күн кешіп жатырмыз. Бастысы республикамызды көзіміздің қарашығындай сақтап, елдігімізді ту ету әрбір азаматтың қасиетті борышы», – деп сөз сөйледі облыс басшысы марапаттау рәсімі барысында.