Еңбекші құқығы
Атырау облысы бойынша меншікті тілші
Жуырда Атырау теміржолшылары «Әділдік және өркендеу» республикалық қоғамдық қорының өкілдерімен кездесті.
Қордың мақсаты – азаматтық ұстанымы бар адамдарды біріктіре отырып, Президент Қ.Тоқаевтың Жаңа Қазақстан құрудағы әділдік реформаларын жүзеге асыруға үлес қосу.
Қор мүшелерінің қатарында жұмысшылар да, ғалымдар да, мұғалімдер мен дәрігерлер, журналистер, үкіметтік емес ұйым өкілдері, қарапайым тұрғындар да бар. Қор өзіндік манифест қабылдаған. Оның ең бірінші тармағы еңбекші құқығын қорғауға бағытталып, сондай-ақ әлеуметтік теңдік, заңның адамдардың бәріне бірдей екендігі, заңға сәйкес әркімге тең дәрежеде қарау, әрбір азаматтың ар-ожданын құрметтеу және қорғау принциптерімен бекітілген.
Кездесу барысында өкілдік төрағасының орынбасары, бұрынғы теміржолшы Г.Биташева жатық тілмен еліміздегі қазіргі саяси-экономикалық һәм әлеуметтік жағдайды саралай келе, темір жолдағы қозғалыс және еңбек қауіпсіздігі, жұмысшылар мүддесі хақында әңгімелеп берді. Қатысушыларға бюллетеньдер таратылып, қор қатарына қосылуға ұсыныс білдірілді.