Электр қуаты кідіріссіз таратылуда

Қызылорда магистральдық желі бөлімшесіне қарасты Қызылорда электрмен жабдықтау дистанциясы бөлімшенің оңтүстігіндегі Түркістан станциясынан бастап Жосалы бекетіне дейінгі телім бойындағы теміржол нысандары мен жергілікті тұрғындарды электр қуатымен қамтамасыз етеді.    

Дистанцияның бас инженері Әлім Төлегенов жыл басынан бері  пойыздардың қозғалыс қауіпсіздігін арттыруға, салалық нысандарға электр қуатын кідіріссіз беруге бағытталған жұмыстарға шолу жасады.    

– Жыл басынан бері пойыздық және маневрлік жұмыстар кезінде оқыс оқиға, инцидент орын алуына жол берілмеді. Жалпы дистанция телімдеріндегі СОБ, КТСМ және АЛСН құрылғыларын электр қуатымен қамтамасыз ету және ВЛ-10кВ, РП, ТП, ВЛ-0,4кВ, КТП, ЦРП, РПК, РПП-10кВ секілді электр желілеріне, бағаналары мен құрылғыларға ағымдық жөндеу, техникалық күтім шараларын жүргізу шаралары кінәратсыз, ақаусыз атқарылуда. Биыл 494,1 шақырымдық СОБ желілері ағымдық жөндеуден өткізіліп, 59 дана ағаш бағана, 40 дана темірбетон бағаналар ауыстырылып, жаңартылды. 281 дана ОМ трансформаторы жөнделіп, КЛ-0,4 кв қуаттылығындағы электр желісінің 0,2 шақырымы, КЛ-10 кв желінің 0,3 км аумағы жаңартылды. Теміржол нысандарын қажетті электр қуатымен жабдықтау жұмысы тәулік бойы бақылауда болады. Әр айға белгіленген жоспарлы жұмыстар дер уақытында атқарылып жатыр. Электромеханиктер Сағындық Қуандықов, Жайылхан Сейітов, электромонтерлер Дархан Иниятов пен Нұрболат Шермағанбет секілді өз ісінің мамандары еңбек ететін телімдер мінсіз деп айта аламын, – дейді бас инженер Әлім Төлегенов.

Электр кернеуімен түрлі деңгейдегі желілерде жұмыс жасау кез келгеннің қолынан келе бермейтіні рас. Ол үшін арнайы рұқсат болуы шарт. Міне, осындай қауіпті аймақтағы қауіпті жұмысты атқарушылар   желі бойын жағалап, электр күшінің үзіліссіз таратылуын қамтамасыз етіп отырған қызылордалық дистанция еңбеккерлері қысқа толық дайындықпен келді.