Сарыағаш станциясында пойыздарды өңдеу көрсеткіші артты
Түркістан облысы бойынша меншікті тілші
Статистикалық көрсеткіштерге көз жүгіртсек, Сарыағаш станциясында жүк қабылдап-жөнелту процесі соңғы 10 жылда екі есе өскен. Айталық, 2014 жылы тәулігіне 15 пойыз қабылдап-өткізілген болса, биылғы жылдың он бір айында атқарылған жұмыстың орташа тәуліктік көрсеткіші 27-28 пойызды құрап отыр.
Мемлекетаралық жүк тасымалында стратегиялық маңызы жоғары Сарыағаш станциясында 2022 жылдың шілде айынан бері жылжымалы құрамдарды жоғары дәлдікпен түсіре алатын камерамен бақылау жүйесі іске қосылған. Бір ерекшелігі, бұл пойыздарды жүріп бара жатқан сәтінде-ақ тұнық күйде таспаға жазып үлгеретін сапалы құралдар. Нәтижесінде станциядағы жүк вагондарын өңдеу көрсеткіші едәуір өскен. Яғни бұрынғы 2,5 сағаттың орнына 2 сағат 10 минутқа, тіпті кейбіреулері 1 сағат 10 минутқа дейін қысқарған.
– Мұндай табысқа бейнебақылау камерасын іске қосу арқылы қол жеткіздік. Яғни бұрын пойыздардың төбесіндегі 27 мың вольттық электр кернеуін сөндіріп, вагондарды тексеріп, желіге қайта қосу үшін 40-50 минут уақыт кететін болса, қазір оны сөндірмей-ақ тексере аламыз. Яғни вагон төбесіндегі қақпа пен оның пломбасын, жалпы оның тұтастығы мен бүтіндігін тексеруді камера арқылы жүргізудеміз. Соның арқасында жұмыс өнімділігі еселенді, – дейді станцияның бас инженері Сәкен Әміров.
Негізінен жылжымалы құрам станция аумағына кірген кезде, операторлар әрбір вагонның нөмірін жазып алып, журналға тіркеуге міндетті. Ал ол деректер АБЖ – автоматты басқару жүйесіне енгізілген дерекпен сәйкес келуі тиіс. Ал енді оны тіркеу үшін станцияның технологиялық орталық операторының функционалдық міндеті төмендегіше тізбектеледі. Оның станция ғимаратынан пойыз тоқтаған жолға барып-келгенінен бөлек, жылжымалы құрамды жағалай бастан-аяқ жүріп, көзбен бақылап шығуы тиіс. Енді ең қысқа вагон ұзындығы 14 метр деп алсақ, 59 вагоннан құралған пойыздың жалпы ұзындығы 826 метрге созылады.
– Қазіргі кезде біз бұл қызметті кабинетте отырып-ақ, экрандағы таспаны кідіртіп немесе артқа-алға жылжыту арқылы іске асырып келеміз. Вагон нөмірін журналға тіркеп, салыстыруда мұны технологиялық жетістік деп айтуға лайық, – дейді станция операторы Маржан Бәдір.
Озық үлгі санатына жататын бұл технология Сарыағаш станциясында соңғы жеті жылдан бері қолданылып келеді. Осылайша мұнда еңбек қауіпсіздігі сақталудан бөлек, уақытты тиімді пайдалану арқылы жұмыс жедел әрі сапалы орындалуда.
Жалпы, станцияға келген пойыздарға техникалық және коммерциялық бағыттарда қызмет көрсетіледі десек, екі ел шекарасы түйіскен тұстағы мекемеде қазақ-өзбек теміржолшылары тізе қоса еңбек етеді. Яғни күн сайын таңертең көрші елден арнайы вагонмен мамандар келіп, пойыздарды қабылдап, тапсырып жатады. Ал олардың ел теміржолшыларымен бірлесе жұмыс істеуіне барынша жағдай жасалған.
Қазіргі кезде Нұрлан Мәдіқұлұлы жетекшілік ететін станциядан Өзбекстан бағытына қарай шығарылып жатқан жүк құрамының басым бөлігін контейнерлік тасымал құрап отыр екен. Пойыздарды өңдеуде көрсеткіші жоғары екінші класты станцияда бүгінде 250-ге жуық теміржолшы еңбек етеді. Сәтті үйлестірілген еңбек ырғағының сақталуы нәтижесінде бір мезетте 4 пойызды қабылдап, өңдеу мүмкіндігіне ие.