Жоспар нақтыланды

Атырау магистральдық желі бөлімшесі биылғы жылға арналған негізгі жоспарлары мен міндеттерін нақтылады.  

Бөлімше бастығы Аралбай Қосымбаевтың айтуынша, инфрақұрылымды, соның ішінде жол жағдайын жақсарту және пойыздардың қозғалыс жылдамдығын арттыру мақсатында 2025 жылы бөлімше бойынша 66,7 км жолды күрделі жөндеу және 11,6 км орташа күрделі жөндеу жұмыстарын жүргізу көзделіп отыр. Сонымен қатар 4 км темірбетон шпалдарын жаппай ауыстыру, 30 жиынтық бұрма ауыстыру, түйіспелерді темірбетон шпалдармен нығайту, түйіспесіз рельстерді станция аралығына дейін ұзарту, балшыққа батқан бұрмаларды қайта салу, т.т. жұмыстар жоспарлануда. Қызметкерлердің санитарлық-тұрмыстық жағдайын жақсарту мақсатында ғимараттарды су және газбен қамтамасыз ету үшін тиісті ұйымдардан техникалық шарттар алу, электр қуаты бойынша төленетін ғимараттарда есептеу құралдарын орнату жұмыстары жүргізіліп жатыр.  

«Сондай-ақ жергілікті атқарушы органмен бірлесе келесі мәселелерді шешуді жоспарлап отырмыз. Ол – Атырау станциясының вокзалы перронын күрделі жөндеу, Мақат станциясындағы 54 пәтерлі үйлер мен жаяу жүргіншілер көпірін мемлекеттік меншікке беру жұмыстарын жүргізу жұмыстары. Аталған мәселе ҚТЖ басшылығының Атырау өңіріне іс-сапары барысында көтеріліп, оң шешімін табу тапсырылған болатын. Және жергілікті атқарушы органмен бірлесе отырып маңызы бар теміржол өткелдерінде жол қауіпсіздігін сақтау мақсатында бейнебақылау орнату мәселесін де қарастырып отырмыз. Ал өткен жылы Атырау магистральдық желі бөлімшесі барлық мақсаттар мен міндеттерді толықтай орындауға қол жеткізді. «Санитарлық-гигиеналық жағдайларды жақсарту және еңбекті ұйымдастыру деңгейін арттыру бағдарламасын» енгізуде көрсеткен көмегі мен қолдауы үшін Дирекция басшылығына алғыс айтқым келеді. Осы бағдарламаның арқасында бүгінгі күні қызметкерлердің әлеуметтік және тұрмыстық ахуалы жақсарып, еңбек жағдайы қамтамасыз етілді. Көптеген модульді үйлер алынып, жұмысшыларға жайлы жағдай жасалды» дейді бөлімше басшысы.