Маңғыстаулық теміржолшылар Амал мейрамын атап өтті (Фото)
Маңғыстау облысы бойынша меншікті тілші
Рамазан айының жұма күніне тұспа-тұс келген биылғы Көрісу күні маңғыстаулықтар үшін әдеттегідей таңсәріден көрісіп, бір-біріне жылы лебізін білдіруден басталды.
Кішілер жасы үлкендерге көрісе барып, аққа ауыз тиіп, көкке аман жеткеніне қуанып, бір-бірін жаңа жасымен құттықтады. «Жақсы сөз – жарым ырыс», дегендей айлардың және күндердің сұлтаны күнімен қатар келген Амал мейрамында үлкендерден көбірек бата алып, алғыс естуге асықты.
Маңғыстау жүк тасымалы бөлімшесі мен Маңғыстау магистральдық желі бөлімшесі Наурыз мейрамын осылай көтеріңкі көңіл-күйде бүгіннен бастап кетті. Барлығы ұлттық нақышта киінген, ұжымдағы татулық пен ауызбіршіліктің үлгісін паш етіп, Көрісу күнін көңілді қарсы алды.
Жүк тасымалы бөлімшесі бастығы Нәжімеден Ғұбашов бастаған тағы бір топ теміржолшы Отпан таудағы дәстүрлі от жағу рәсіміне қатысты. Жыл сайын жалғасатын Отпандағы Амал тойында жиналған жұртпен төс қағыстырып, қол алысып, амандық-саулық сұрасты. Жыл жақсылығымен, ырыс- несібесімен, жеміс-жеңісімен, береке-бірлігімен, тоқшылық- аманшылығымен келсін, деп бір-біріне келер жылға аман жетуді тіледі.
Еліміздің Түркіменстанмен шекарасындағы Болашақ станциясында тіпті ерекше тартымды көрісу болды. Болашақ станциясы бастығы Мақсат Нұрбековке ауылдағы балабақша бүлдіршіндері көрісіп келді. Ұлттық киімдерімен сәнденген балдырғандар "Жылыңыз құтты болсын" деп жетектесіп кіріп келгенде станцияда қуанбаған адам қалмады. Теміржолшылар балаларға бар жақсы тілегін арнап, тәттілер таратты.
