Сән-салтанаты жарасқан
Ақтөбе облысы бойынша меншікті тілші
Ақтөбелік теміржолшылар наурыз айы басталғаннан ұлттық нақышта безендірілген камзолдарын қапсырып, шапандарын жамылып, ерекше сән-салтанат құрып жүр.
Жастар жағы TikTok әлеуметтік желісіне ұлттық киіммен түрлі видеолар салып, бірінен бірі асып түсуде. Еліміздің батыс өңірі үшін «Көрісу» – ерекше аталып өтетін дәстүр. Сондықтан 14 наурыздан басталған мерекелік шаралар әлі жалғасуда.
«Қызметкерлердің барлығы ұлттық киіммен жүр. Наурыз айының соңына дейін ұлттық нақышта жүреміз деп шештік. Бұл құндылықтар бізге жақын. Мереке рамазан айымен тұспатұс келгендіктен дастархан жасау болмады. Бірақ 22 наурыз күні кең көлемде атап өтіледі», – деді магистральдық желі бөлімінің кадр қызметінен Гүлден Сарқұлова.
Айтуынша, 22 наурыз күні теміржол вокзалының алдына киіз үй тігіледі. Наурыз көже таратылып, ұлттық ойындардан жарыс өтеді. Қайырымдылық жасау – ораза айында теміржолшы жастардың дәстүрлі түрде қолға алатын шараларының бірі. Биыл да қарт кісілердің ауласын тазалап, қарын күреп, көмек көрсетуде. Ал ұлттық спорт ойындары барлық теміржол мекемелерінде өтіп жатыр.
