Халықтық мерекеге ұласты

Ұлыстың ұлы күні Ақтөбе вокзалы аумағына киіз үй тігіліп, этноауыл құрылды. Мерекелік атмосфераға бөленген алаңда теміржолшылар ғана емес, жергілікті халық, әрі-бері өткен пойыз жолаушылары да қазақы үйлерге кіріп, естелік суреттерге түсіп, ұлттық тағамдардан дәм татып, шат-шадыман болды.

Киіз үйге қойылған ұлттық бұйымдар да көз тартады. Ақ жаулықты аналар шашу шашып, қазан-қазан көже асылды. Осылайша Ақтөбе магистральдық желі бөлімшесі ұйымдастырған шара шынайы халықтық мерекеге айналды.  

«Жыл басы Наурыз мерекесі ертеден жақсылықтың бастауы болған. Әр шаңыраққа құт-береке, молшылық, саулық тілеймін. Әрқашан кедергі болмасын, әрдайым жолымыз болсын», – деді Ақтөбе магистральдық желі бөлімі басшысының орынбасары Темірғали Көштаев.  

Теміржолшылар ұлттық киімнің сән-салтанатын сақтаған. Қыз-келіншектер, ақ жаулықты аналар, азаматтар мен ақсақалдар өздеріне жарасымды ұлттық киіммен жүрді. Теміржолшылар даярлаған мерекелік концертте шараның көркін аша түсті. Әнші де, биші де, күйші де бар.  

Қазан-ошақ жағына көңірсіген әдемі ас пен түтін иісі шығады.   Келіншектер наурыз көже дайындарда негізгі үш қағиданың сақталғанын айтты. Бірінші сақталған сүр ет, дәнді-дақыл және ағарған. Осы тәртіппен жеті түрлі дәм қосылған. Бабымен дайындалған наурыз көже келушілерге ұсынылды. Көже ішіп, дастарханға қойылған ұлттық тағамдардан дәм татып, қызыл  бауырсақ, құрт-ірімшік, тарыдан дайындалған тағамдар мен женттен дәм татқан жұрт айрықша риза болысты.    

Сонымен қатар вокзал алдында ұлттық ойындардан жарыс өтті. Кәсіподақ қоодауымен арқан тартыс, ләңгі, асық атудан озып шыққандарға сыйлықтар табысталды.