Мамандық таңдау – маңызды іс
Атырау облысы бойынша меншікті тілші
Жуырда С.Мұқашев атындағы Атырау политехникалық колледжінің «Теміржол көлігінде тасымалдауды басқару және ұйымдастыру» бөлімінің 2 және 3 курс студенттері Атырау теміржол мекемелерінде болып, жұмыс барысымен танысты.
Атырау магистральдық желі бөлімшесінің ашық есік күнін ұйымдастыруына орай студенттердің теміржол шаруашылығымен жақын танысуына мүмкіндік жасалды. Атырау электрмен жабдықтау дистанциясына 34 студент, Атырау және Ақжайық сигнализация және белгі беру дистанцияларына 65, Атырау жол дистанциясына 22, Атырау вокзалына 22 студент барып, болашақ теміржолшылар өндіріспен жан-жақты танысты. Аталған мекеме басшылары мен мамандары теміржолшы мамандығы туралы өздері жүріп өткен жолдарынан естелік айтып, мысалдар келтіре отырып әңгіме өрбітті. Олар жас буынға теміржолшы болудың қиындығы мен жауапкершілігі, темірдей тәртіп, қозғалыс қауіпсіздігі мен еңбек қорғау, маман білуге тиіс басты қағидаларды түсіндірді.
Сонымен қатар қазіргі кездегі теміржолшылардың әлеуметтік жағдайы, жалақысы, еңбек процесіндегі арнайы киіммен қамтамасыз ету, жұмысшыға қойылатын талап, оның құқығы мен міндеттері, еңбек және қозғалыс қауіпсіздігін сақтау бойынша жауапкершілігі, жас маманның мансаптық өсу жолдары, т.б. жайттар әңгіме болды. Студенттер өздерін қызықтырған сауалдарын қойып, оған кәсіби жауап алды.
Студенттерді бастап келген колледж ұстаздары Нағима Сатимова мен Әйгерім Қазмағамбетова шәкірттеріне үлкен өндірістің есігін ашып, жан-жақты білім беріп, экскурсия ұйымдастырған теміржол кәсіпорындарының басшыларына, теміржолшыларға шын жүректен алғыс айтты.
Бүгінде колледждің аталған бөлімінде 1-4 курста 87 студент білім алып жатса, 4 курс шәкірттері қазіргі уақытта теміржол мекемелерінде өндірістік тәжірибеден өтіп жүр.
