Қондырғылар жаңартылуда

Атырау сигнализация және байланыс дистанциясында 6 дана жаңартылған контейнерлік техникалық жабдықтар кешенінің жүріс модульдері орнатылды. Атырау – Қиғаш телімінің Аққыстау, Исатай, Афанасьево бекеттеріне орнатылған бұл құрылғылар пойыз қозғалысы кезінде жылжымалы құрамның техникалық жағдайын автоматты түрде бақылайды.

Сондай-ақ 465-разъезде (ШЧ-11) жаңа типті модернизацияланған электрлік орталықтандырылған пост салынып, пайдалануға берілді. Енді аймақтағы бағдаршамдар мен бұрмалардың жұмысы, жалпы байланыс саласының жұмысы бұрынғыдан да жақсара түсті. Биыл Атырау станциясында соңғы отыз жыл бойы қолданылып келе жатқан қуат қондырғылары жаңарды. Яғни бұрынғы ПВ-1, ЭЦК, ПРББ, ПВ-220, ПВ-24 қондырғылары жаңа типтегі ПП-ЭЦ-70 түріне ауыстырылды. Атырау сигнализация және байланыс дистанциясының бастығы Ербол Нұрмановтың айтуынша, станциядағы қуат көздері панельдері жаңартылып, оның жұмысы бұрынғыдан да жақсара түскен. Сонымен қатар бұрынғы функцияларымен қоса ол енді автоматты түрде қосылатын және оны бақылайтын операциялармен толықтырылған. Мәселен, бір фидер ажыратылған жағдайда екіншісі, егер ол да ажыратылса, дизельді агрегат автоматты түрде іске қосылып, станция жолдары қуат көзімен үнемі қамтамасыз етіліп отырады.  

«Жұмыс барысында электрлік орталықтандыру құрылғыларының қоректендіру кабельдері мен трансформаторлары жаңарды. Енді ол болашақта ақаулардың аз болуына себепші болады», – дейді дистанция бастығы.  

Сағыз станциясынан Ганюшкино станциясына дейінгі жол телімі ВОЛС желісіне қосылып, мұнда да ақпаратты үлкен көлемде және шұғыл беруге жағдай жасалған. Сигнализация және байланыс шаруашылығы бойынша бірқатар учаскелерде қозғалыс қауіпсіздігін қамтамасыз ету үшін жүріп бара жатқан қозғалмалы құрамның техникалық жағдайына автоматты бақылау жасайтын құрылғы (КТСМ) іске қосылды. Атап айтқанда, Құлсары және Атырау дистанцияларында Мақат – Құлсары учаскесі бойынша Бек-Бике разъезінде, Құлсары – Бейнеу учаскесінде Қоркөл станциясында, Атырау – Ақсарай учаскесі бойынша Тұманды мен Д.Нұрпейісова бекеттерінде 7 дана контейнерлік типтегі жаңартылған модульді техникалық құралдар кешені орнатылған. Мақат, Ақжайық станцияларында «Модернизация ЛАЗ» жобасы аясында желілік-аппаратты залдарда каналдарды нығыздаудың жаңа буынды қолжетімді, заманауи интеллектуалды мультисервистік концентраторға модернизациялау жүзеге асырылған.